პრემიერ ლიგა ნელ-ნელა დასასრულს უახლოვდება. "მანჩესტერ იუნაიტედს" მხოლოდ შვიდი მატჩი დარჩა სათამაშო. ოლე გუნარ სოლსკიაერის განცხადებით, მისი გუნდი ყველაფერს გააკეთებს, რათა ოთხეულში ადგილი დაიკავოს.

ორშაბათს გამართულ პრესკონფერენციაზე, ოლე გუნარმა ინგლისის თასიდან გამოვარდნაზე ისაუბრა და აღნიშნა, რომ ამ დამარცხებამ მათი სიამაყე შელახა.

"როცა ასეთ მატჩს აგებ, რა თქმა უნდა, ყველანაირად ცდილობ, რომ განწყობა შეინარჩუნო და ამ დამარცხებამ შემდეგ მატჩებზეც არ იმოქმედოს. ცდილობ, რომ სწორად მიუდგე ყველაფერს. თუმცა უნდა აღვნიშნოთ, რომ "ვულვზის" წინააღმდეგ ჩვენი პრობლემა განწყობა არ ყოფილა, უბრალოდ შესაბამისი ხარისხით არ ვითამაშეთ."

"ვულვზი" ძალიან კარგ ფორმაშია და დიდ გუნდებს სათანადო წინააღმდეგობას უწევენ. მაგრამ თუ ჩემი ფეხბურთელები ისე ითამაშებენ და იმდენ ენერგიას ჩადებენ ამ მატჩში, როგორც ვარჯიშებზე, მაშინ ვფიქრობ, რომ პრობლემები აღარ უნდა შეგვექმნას."

"ყველაფერი ჩვენზეა დამოკიდებული. სწორი პოზიცია, საკმარისი ხარისხი, რთული ტაქტიკა, კრეატიულობა... რა თქმა უნდა, ეს რთულია, მაგრამ სწორედ ამას აქვს ხიბლი. ჩვენთვის ეს ახლა დიდი გამოწვევაა, მაგრამ ჩვენ კონკრეტული მიზანი გვაქვს და ამას აუცილებლად მივაღწევთ. ძალიან გვინდა, რომ მოწინააღმდეგე გუნდი წნეხის ქვეშ მოვაქციოთ."

"რაც შეეხება ოთხეულს, არ მგონია, რომ ფეხბურთელებს იმის შეხსენება დასჭირდეთ, რომ ეს მნიშვნელოვანია და ჩემპიონთა ლიგაზე "იუნაიტედმა" უნდა ითამაშოს. ეს მათ თავადაც ძალიან კარგად იციან."

"სამი თვის წინ ჩვენ ოთხეულს 11 ქულით ჩამოვრჩებოდით და შესაძლოა, ფეხბურთელებს არც სჯეროდათ, რომ ამ ეტაპამდე მოვიდოდით. მაგრამ თუ ჩვენ ჩვენს დავალებას კარგად გავართმევთ თავს, მაშინ ჩემპიონთა ლიგაზე ვითამაშებთ."

პრესკონფერენციაზე ჟურნალისტებმა იკითხეს მეტი წნეხის ქვეშ ხომ არ გრძნობს ოლე თავს, რაზეც მათ შემდეგი პასუხი მიიღეს:

"არა, ჩემი განწყობა ოდნავადაც არ შეცვლილა. საერთოდ არ ვგრძნობ მეტი წნეხის ქვეშ თავს. რა თქმა უნდა, მეტი მაქვს საფიქრალი და წინ უფრო მეტად უნდა გავიხედო, მაგრამ მე ჯერ კონკრეტულ მატჩებზე ვარ კონცენტრირებული. აქ იმისთვის ვიყავი და ვარ, რომ თამაშები მოვიგო, შესაბამისად, არაფერი შეცვლილა."

"არ ვიცი, აქ რამდენი ხანი დავრჩები და დავყოფ თუ არა "იუნაიტედში" იმდენ წელს, რამდენიც სერ ალექსმა გაატარა, მაგრამ სანამ აქ ვარ, ყველაფრისგან მაქსიმალური სიამოვნების მიღებას ვაპირებ."


წყარო: ManUtd.com