"მანჩესტერ იუნაიტედის" ფრანგმა ნახევარმცველმა, პოლ პოგბამ, მადრიდის "რეალში" გადაბარგება მოითხოვა, ინფორმაციას ესპანური AS-ი ავრცელებს.

წყაროს ცნობით, 26 წლის მოთამაშემ, ინგლისურ გრანდთან კონტრაქტის გახანგრძლივებაზე უარი უკვე განაცხადა და სამომავლო კლუბებზეც დაიწყო ფიქრი. "ლოს ბლანკოსთან" ერთად, პოგბას სავარაუდო სამყოფელი შესაძლოა, ტურინის "იუვენტუსი" აღმოჩნდეს, რომელმაც ბოლო დროს, მისი დაბრუნების სურვილი გამოიჩინა.

შეგახსენებთ, რომ რამდენიმე კვირის წინ გაკეთებულ განცხადებაში, ზემოთ ხსენებულმა ფეხბურთელმა, სამეფო გუნდში ტრანსფერს, ნებისმიერისთვის საოცნებო რამ უწოდა.

"როგორც ყოველთვის ვამბობდი ხოლმე, "რეალ მადრიდში" თამაში ყველას ოცნებაა. ეს ერთ-ერთი ყველაზე დიდი კლუბია მსოფლიოში. მათ ზინედინ ზიდანი წრთვნის და ეს ყველა იმ ფეხბურთელის ოცნებაა, ვისაც ეს სპორტი მართლა უყვარს. ახლა მე "იუნაიტედში" ვარ. წარმოდგენა არ გვაქვს, თუ რას მიმზადებს მომავალი, მაგრამ "იუნაიტედში" ვარ და აქ ბედნიერად ვგრძნობ თავს" - განაცხადა 25 წლის ნახევარმცველმა.