ოლე გუნარ სოლსკიაერი აცხადებს, რომ მომდევნო ზაფხულს სატრანსფერო ფანჯრის გახსნისას გუნდის გაძლიერების პროცესში ფულს ჭკვიანურად დახარჯავს.
46 წლის სპეციალისტი "მანჩესტერ იუნაიტედის" მთავარ მწვრთნელად სამწლიანი ვადით დაინიშნა და ახალ რანგში გამართულ პირველივე პრესკონფერენციაზე განაცხადა, რომ მის კლუბს რამდენიმე აგენტი უკვე უკავშირდება ტრანსფერთან დაკავშირებით.
"იუნაიტედი" არის კლუბი, რომელსაც აქვს ფული და ეს ფული უნდა დაიხარჯოს მიზნობრივად. ვინც მიცნობს, იცის, რომ კარგად დავხარჯავ.
კლუბთან ერთად უკვე გვაქვს მიზანი დასახული, ფეხბურთელებს ჩემს მოსვლამდეც აკვირდებოდნენ და ჩვენს განკარგულებაში უკვე არიან მოთამაშეები, რომელთა შენარჩუნებაც საჭიროა. ფულს მხოლოდ იმისთვის არ დავხარჯავთ, რომ უნდა დაიხარჯოს", - განაცხადა სოლსკიაერმა.
სოლსკიაერმა ასევე იმედი გამოთქვა, რომ წინასასეზონო ტურნეს დაწყებამდე უკვე მოახერხებს ისეთი ფეხბურთელების შეძენას, რომლებიც სურს.
ვინც არ უნდა მოვიდეს კლუბში, წამსვლელებზეც მოახდენს გავლენას და ასეთ კანდიდატებად ანტონიო ვალენსია, ხუან მატა და ანდერ ერერა გვესახებიან, რომელთაც ზაფხულში კონტრაქტი უმთავრდებათ.
"ამ კლუბში საუკეთესო ფეხბურთელები გვჭირდება. იმედი ვიქონიოთ, რომ კლუბი და ფეხბურთელები შეთანხმებას მიაღწევენ. მომდევნო სეზონში ძლიერი გუნდი გვეყოლება. ჩემი მოსვლის შემდეგ ანდერი ძალიან კარგი იყო".