"დორტმუნდის" სპორტულმა დირექტორმა მაიკლ ზორკმა განაცხადა, რომ "მანჩესტერ იუნაიტედსა" და სანჩოსთან დაკავშირებული ჭორები სრულიად არარელევანტურია.
ბოლო დროს ბევრი იწერებოდა "იუნაიტედისა" და სანჩოს შესახებ. ახალგაზრდა ფეხბურთელი, რომელსაც 19 წელი სამშაბათს შეუსრულდა, 100 მილიონ ფუნტად ფასდებოდა. სანჩოს შეძენის ინტერესი "წითელმა ეშმაკებმა" და პსჟ-მ გამოიჩინეს. შესაბამისად, ზორკს პოტენციური ტრანსფერის შესახებ კითხვები დაუსვეს, რაზეც მან შემდეგი პასუხი გასცა:
"წარმოდგენა არ მაქვს რაზე საუბრობთ, მაგრამ შემიძლია გითხრათ, რომ ჩვენთვის ეს შემოთავაზება ამ მომენტისთვის სრულიად ირელევანტურია."
სანჩო "დორტმუნდში" "მანჩესტერ სიტიდან" გადავიდა 2017 წლის ზაფხულში. ლონდონელ ვარსკვლავს "დორტმუნდთან" კონტრაქტი 2022 წლამდე აკავშირებს.
"დორტმუნდის" სპორტულმა დირექტორმა განაცხადა, რომ მართალია სანჩო ერთ დღეს კლუბს დატოვებს, მაგრამ მომავალ სეზონში ისევ "ბორუსიას" მაისურით ითამაშებს.
"სანჩოს ფასზე ჯერ ვერ ვისაუბრებთ, მაგრამ დანამდვილებით გეტყვით, რომ მისი შეძენა მსოფლიოს უდიდეს კლუბებსაც კი გაუჭირდებათ."
"ჯეიდონი შემდეგ სეზონში "დორტმუნდში" ითამაშებს და ჩვენ ეს უკვე დაგეგმილი გვაქვს. ისიც კარგად ვიცით, რომ კარიერის ბოლომდე აქ არ დარჩება, მაგრამ მომავალ სეზონში ჩვენთან იქნება."