"წითელი ეშმაკების" ერთ-ერთმა ფავორიტმა ფეხბურთელმა ხუან მატამ, შესაძლოა, სულ მალე "მანჩესტერული" კარიერა საკუთარი ნებით დაასრულოს. ფეხბურთელი, ხელმძღვანელობის მხრიდან შეთავაზებულ ახალ ხელშეკრულებას ხელს არ აწერს.
30 წლის ესპანელს, "მანკუნიანელებთან" ხელშეკრულება მიმდინარე წლის ზაფხულში ეწურება, რის შემდეგაც მას თავისუფალი აგენტის სტატუსით, ნებისმიერი კლუბის მაისურის მორგება შეეძლება.
მოლაპარაკებების ჩიხში შესვლა შეთავაზებულ ხელშეკრულებამ გაანაპირობა, მატას კლუბის მენეჯმენტმა მხოლოდ ერთწლიანი კონტრაქტი შესთავაზა, ფეხბურთელის სურვილები კი შემდეგნაირია: ახალი გრძელვადიანი კონტრაქტი, გაუმჯობესებული სახელფასო განაკვეთით.
მიმდინარე სეზონში, მატამ ინგლისის პრემიერ ლიგის 18 შეხვედრაში მიიღო მონაწილეობა, საკუთარი აქტივი კი 2 გოლით და 3 საგოლე გადაცემით შეავსო.