ჯიანლუიჯი ბუფონმა სერ ალექს ფერგიუსონთან დაკავშირებულ მოგონებებზე ისაუბრა. იტალიელმა განაცხადა, რომ შოტლანდიელი დიდხანს ცდილობდა მის გადაბირებას "ოლდ ტრაფორდზე".
ჩემპიონთა ლიგის მატჩის წინ, იტალიელმა ლეგენდამ რიო ფერდინანდს ინტერვიუ მისცა. როგორც ბუფონი აცხადებს, "იუნაიტედის" მის შეძენას 1995 წლიდან 2001 წლამდე ცდილობდა. სერ ალექს ფერგიუსონი მას პიტერ შმეიხელის შემცვლელად მოიაზრებდა. შეგახსენებთ, რომ მან "ოლდ ტრაფორდი" 1999 წელს დატოვა.
შმეიხელის შესაცვლელად "იუნაიტედს" დიდი ხანი დასჭირდა. სათანადო მეკარე "ოლდ ტრაფორდზე" მხოლოდ 2005 წელს გამოჩნდა, ედვინ ვან დერ სარის მოსვლის შემდეგ. შეგახსენებთ, რომ "მფრინავი ჰოლანდიელი" "წითლებმა" "ფულემიდან" გადმოიბირეს.
"მაშინ, როცა ჯერ კიდევ პატარა ბიჭი ვიყავი და "პარმაში" ვთამაშობდი, ფერგიუსონი ჩემით დაინტერესდა. ორი თუ სამი წლის განმავლობაში რამდენიმე სკაუტი გამოგზავნა ჩემ საყურებლად. იმ მომენტისთვის, "პარმა" ყველაფერს ნიშნავდა ჩემთვის და საერთოდ არ მსურდა დატოვება."
2001 წელს ბუფონი "იუვენტუსს" შეუერთდა და "ბებერი ქალბატონების" მაისურით 500 მატჩი ჩაატარა. მისი კარიერის საბოლოო ტრანსფერი კი "იუვენტუსიდან" პსჟ-ში გადასვლა აღმოჩნდა.
თუმცა, როგორც იტალიელმა განაცხადა, კიდევ ჰქონდა შანსი ინგლისში თამაშის, რაზეც უარი განაცხადა.
"მოგვიანებით მე "მანჩესტერ სიტი" დამიკავშირდა, სწორედ მაშინ, როცა გუნდის შენება დაიწყეს. მათ სურდათ, რომ მათი პირველი შენაძენი ვყოფილიყავი, მაგრამ "იუვენტუსში" დავრჩი."