პორტუგალიელი მარჯვენა მცველი ჟოზე მოურინიომ "პორტოდან" შეიძინა. "იუნაიტედში" გადმოსვლის შემდეგ მან 11 მატჩი ჩაატარა. მან "Sky Sports"-ს ექსკლუზიური ინტერვიუ მისცა, სადაც აღნიშნა, რომ აქ უკვე ძალიან ბევრი რამ ისწავლა და კიდევ დიდი ხნით სურს "ოლდ ტრაფორდზე" დარჩენა.
"ეს ჩემთვის ძალიან დიდი გამოცდილებაა. ვფიქრობ, რომ სეზონის პირველი ნახევარი რთული იყო, რადგან ძალიან ბევრი ტრავმა მქონდა და სრული დატვირთვით თამაში და მუშაობა მხოლოდ დეკემბერში დავიწყე."
"ჩემთვის ეს წელი გამოცდილების მიღებისა და სიახლეების წელი გახლდათ და დარწმუნებული ვარ, რომ სეზონის ბოლომდე ძალიან ბევრს ვისწავლი. ვისწავლე და შევეგუე როგორია ამ სიტუაციაში ყოფნა, ტრავმის მიღება, სტადიონს მიღმა ყოფნა და შემდგომ დაბრუნება. ჩემთვის ამის სწავლა ძალიან დიდი მიღწევაა და ვფიქრობ, რომ ძალიან კარგად ვართმევ ყველაფერს თავს."
"მე სრულ სიამოვნებას ვიღებ. როცა ამ კლუბში მოვდიოდი, ვიცოდი, რომ ეს ყველაფერი ჩემთვის ძალიან რთული იქნებოდა, ძალიან ბევრი კარგი ფეხბურთელი გვყავს ჩემს პოზიციაზე და მათგან ბევრი რამის სწავლა შემიძლია. ვფიქრობ, რომ შემიძლია ჩემს თავს შევუქმნა შესაძლებლობები და ამ გუნდში ბევრი წელი ვითამაშო."
"ვფიქრობ, ოლე გუნარის მოსვლის შემდეგ ყველაზე დიდი განსხვავება გასახდელში დატრიალებული ატმოსფეროა. რა თქმა უნდა, ტაქტიკური მიდგომებიც შეიცვალა და ძალიან კარგად ვთამაშობთ, წინ წავიწიეთ და შემტევ სტილზე გადავედით. ასე რომ, რა თქმა უნდა, რაღაცები შეიცვალა და იმედია, რომ კიდევ ბევრი რამ შეიცვლება და ჩენ განვითარებას განვაგრძობთ. ჯერ სრულყოფილები არ ვართ, სამუშაო ძალიან ბევრია."
"ვფიქრობ, რომ ჩვენი თამაში მხოლოდ მწრთვნელის შეცვლის შედეგი არ არის. შენთვის ფიქრობ: "ჰო, მწრთვნელი შეიცვალა და მგონი მეც უნდა შევცვალო რაღაც ჩემს თავში." ვფიქრობ, რომ უკეთესობისკენ შევიცვალეთ და ამაზე შედეგებიც მეტყველებს."
"უმაღლესი დონის ფეხბურთელებთან ჩემს შედარებას ჩემთვის პასუხისმგებლობა მოაქვს. მე საკუთარ თავს არ მივიღებ მანამ, სანამ უმაღლეს დონეზე არ ვითამაშებ."
"მოურინიოს სიტყვები მახსოვს, რომელიც სულ იმას მიმეორებდა, რომ ჩემი საკუთარი ისტორია უნდა ამეშენებინა აქ და ყოველთვის მეცადა, რომ უკეთესი გავმხდარიყავი. ვიმედოვნებ, რომ აქ ძალიან, ძალიან ბევრი წელი დავრჩები და ყველაფერს გავაკეთებ, რომ ვიყო საუკეთესო."