ინგლისის პრემიერ ლიგის 27-ე ტურის ცენტრალურ მატჩში უგოლო ფრე დაფიქსირდა. შეხვედრა დავიდ დე ხეასთვის საიუბილეო გამოდგა - ესპანელმა მეკარემ პრემიერ ლიგის ეგიდით ჩატარებულ შეხვედრებში მე-100 მშრალი მატჩი ჩაატარა.

ამ მაჩვენებლით 28 წლის ესპანელი მე-15 მეკარე გახდა, რომელმაც ამ ნიშნულს მიაღწია, ხოლო პეტერ შმეიხელის შემდეგ მეორე, რომელმაც ეს "იუნაიტედის" მაისურით შეძლო.

დავიდ დე ხეა "მანჩესტერ იუნაიტედში" 2011/12 წლის სეზონის შემდეგ ასპარეზობს. ამ დროის მანძილზე ესპანელმა პრემიერ ლიგის ეგიდით 264 შეხვედრაში მიიღო მონაწილეობა. საერთო ჯამში 28 წლის მეკარემ "იუნაიტედის" მაისურით 348 შეხვედრა ჩაატარა და 128-ჯერ მოახერხა კარის მშრალად შენახვა.

შეგახსენებთ, რომ "იუნაიტედის" რეკორდი პრემიერ ლიგის მშრალი მატჩების რაოდენობით, პეტერ შმეიხელის ანგარიშზეა, რომელმაც 112 შეხვედრაში მოახერხა გოლის არ გაშვება.