"იუნაიტედის" გულშემატკივრები არაფერს ელიან ისე, როგორც "ლივერპულთან" დაპირისპირებას. წინა მარცხის შემდეგ მოურინიომ "ოლდ ტრაფორდი" დატოვა. ახლა კი გულშემატკივრები კიდევ უფრო მოუთმენლად ელიან "მერსისაიდელების" სტუმრობას "ოცნების თეატრში". მატჩის წინ აღელვებულია ოლე გუნარიც:
"მათთვის დიდი მატჩია, ჩვენთვისაც დიდი მატჩია. ჩვენ ძალიან გვინდა, რომ ოთხეულში მოვხვდეთ. ამას გარდა, ეს ჩვეულებრივი პრემიერ ლიგის მატჩი არ არის, ეს "ლივერპულის" წინააღმდეგ გამართული თამაშია. ეს უდიდესი მატჩია სამუშაო პერსონალისთვის, ფეხბურთელებისთვის, გულშემატკივრებისთვის, მთლიანად "მანჩესტერ იუნაიტედისთვის". ეს ჩვენთვის კიდევ ერთი გამოწვევაა და მოუთმენლად ველით ამ გამოწვევას."
"გვინდა, რომ ავაშენოთ გუნდი, რომელიც "მანჩესტერ იუნაიტედის" ისტორიის ღირსეული ნაწილი იქნება. თუ ამას სახლშიც შევძლებთ, ჩვენს ისტორიაში კიდევ ერთი ნაბიჯი იქნება, რომლითაც იმ დიად მიზანს მივუახლოვდებით. "ტოტენჰემი", "არსენალი", "ჩელსი" - გასვლით მატჩებზე ჩვენ ყველაფერი შესანიშნავად გავაკეთეთ და სამი გამარჯვება მოვიპოვეთ ზედიზედ, მაგრამ ახლა საჭიროა, რომ იგივე სახლშიც გავაკეთოთ."
"ეს მხოლოდ სიამაყეზე არ არის. მე ვგრძნობ, რომ რამდენიმე ნაბიჯით წინ ვართ ჩვენი მიზნისკენ მიმავალ გზაზე. ჩვენ აუცილებლად გავხდებით გუნდი, რომელიც შიშის ფაქტორს დაიბრუნებს და ლიგაში უფრო და უფრო წინ წაიწევს. ჩვენ ყოველთვის წინ ვიყურებით, წარსული აქ არაფერ შუაშია. მხოლოდ ის მინდა, რომ ფეხბურთელების უკეთ თამაში ვიხილო."
"მე თითქმის არასდროს არ ვაქცევ ყურადღებას რას აკეთებენ სხვა გუნდები. ჩემი მთელი კონცენტრაცია ჩვენს ფეხბურთელებსა და გუნდზეა. მხოლოდ იმაზე ვფიქრობ, თუ სად გვინდა, რომ ვიყოთ. ოთხეულისთვის ვიბრძვი და ესაა ამ მომენტისთვის ჩვენი მიზანი, მაგრამ ამ მომენტისთვის მთელი ძალები, რა თქმა უნდა "ლივერპულისკენ" არის მიმართული. მსურს, რომ "ტოტენჰემმა" მოიგოს ტიტული? არ ვიცი, ამაში არ ვერევი. ალბათ!"
"ვიცით, რომ ახლა ძალიან რთული მატჩი გველის წინ. ისინი ფანტასტიკურები არიან. ისინიც კარგად გვიცნობენ და დარწმუნებული ვარ, "ოლდ ტრაფორდზე" ჩამოსვლა მათთვისაც რთულია. ვფიქრობ, რომ ისინი პატივს გვცემენ, ისევე როგორც ჩვენ. ეს გუნდი ძალიან ბევრი კარგი ფეხბურთელითაა დაკომპლექტებული."