ვიქტორ ლინდელოფის ჩატარებულმა მატჩებმა ბოლო დროს გულშემატკივარი მოხიბლა. შვედმა 27 მატჩი გაიტანა და "ბარნლისთან" თავისი პირველი გოლიც გაიტანა "იუნაიტედის" მაისურით. გულშემატკივარმა მას "ყინულის კაცი" შეარქვა. იხილეთ ვიქტორ ლინდელოფის ვრცელი ინტერვიუ:

"წაგება მთელი არსებით მძულს. ეს ყველაზე საშინელი რამაა იმათ შორის, რაც შეიძლება, რომ დამემართოს. მე ყოველთვის გამარჯვება მსურს, წაგების შემდეგ ვგიჟდები, ემოციებს ვერ ვაკონტროლებ. ეს შეიძლება რამდენიმე საათი გაგრძელდეს და ჩემმა ცოლმა ამის შესახებ შესანიშნავად იცის.

სახლში დაბრუნებულს ცოტა ხანი არც კი მელაპარაკება ხოლმე (იცინის). მაგრამ მიუხედავად ამისა, ვფიქრობ, რომ ძალიან მნიშვნელოვანია ამ ყველაფრის გაშვება. არაუშავს, თუ ამაზე გაბრაზდებით, ეს აუცილებელიც კი არის, თუმცა ამ ყველაფერს ჩავლის უფლება უნდა მივცეთ. რამდენიმე საათი საკმარისი უნდა იყოს ფორმაში ჩასადგომად და მგონია, რომ ეს ძალიან კარგად გამომდის.

ვზივარ და ჩემთვის ვფიქრობ ხოლმე: "კარგი, წავაგეთ, რაც, რა თქმა უნდა, გამაღიზიანებელია, თუმცა მოდი სვლა განვაგრძოთ, რათა დავრწმუნდეთ, რომ ეს ისევ არ მოხდება. მე გამარჯვება ძალიან მიყვარს, მაგრამ ზუსტად ისევე ვიქცევი გამარჯვების შემთხვევაში, როგორც დამარცხების შემდეგ. ვცდილობ, მეორე დღეს ესეც წარსულში დავტოვო, რათა მომავალ მატჩზე კონცენტრირება და კიდევ ერთი გამარჯვების მოპოვება შევძლო.

რაც შეეხება ჩემს მანჩესტერში ცხოვრებას, აქ ყველაფერი ძალიან მომწონს. საოცარი ხალხია, რესტორნებიც და სხვადასხვა ადგილბიც შესანიშნავია. კარგად დასვენებასაც და გართობასაც მოახერხებ. ვფიქრობ, ამ ქალაქს ყველაფერი აქვს, რაც გჭირდება.

მე ქალაქიდან ცოტა მოშორებით ვცხოვრობ და იქაც ძალიან ლამაზი გარემო გვაქვს. ჩემთვის ძალიან მნიშვნელოვანია, რომ ჩემს ცოლსაც მოსწონდეს ეს ყველაფერი და მიხარია, რომ ისიც სიამოვნებას იღებს აქ ყოფნით.

ზოგადად სეზონის განმავლობაში სახლში ყოფნა და დასვენება მიყვარს, მაგრამ როცა გარეთ გავდივარ და გულშემატკივრებს ვხვდები, რომლებსაც ფოტოს გადაღება ან უბრალოდ გამარჯობის თქმა სურთ, ძალიან მსიამოვნებს.

გულშემატკივრები ყოველთვის გვერდით გვიდგანან და დამატებით ენერგიას გვმატებენ. ჩვენ გვსურს, რომ რაც შეიძლება მეტი გავაკეთოთ, რაც შეიძლება მეტი გოლი გავიტანოთ და ყველა მატჩი მოვიგოთ. ეს ყველაფერი კი მხოლოდ მათთვის გვინდა. მე ძალიან მადლიერი ვარ თითოეული მათგანის, რადგან საოცარი მხარდაჭერა ვიგრძენი და ეს ჩემთვის ძალიან მნიშვნელოვანია.

ბოლო რამდენიმე კვირით, ალბათ, ყველა მოხიბლული იყო. ჩვენ ძალიან კარგ მატჩებს ვატარებდით.

ყველამ შეძლო მისი შესაძლებლობევის გამოვლენა. ვფიქრობ, რომ კიდევ უფრო მეტი უნდა ვიმუშავოთ, მეტი გავაკეთოთ და გულშემატკივრის გახარება განვაგრძოთ. ჩვენ ყოველთვის ჩვენი შესაძლებლობების 100% უნდა დავტოვოთ მოედანზე, არა 99% ან 90%, არამედ მთლიანად ყველაფერი, რაც გაგვაჩნია.

მე ძალიან ბედნიერი ვარ, როცა გუნდს რამეში ვადგები. მე გუნდური მოთამაშე ვარ და ჩემთვის კლუბი ყველაზე და ყველაფერზე მნიშვნელოვანია. უბრალოდ მიხარია, როცა გუნდისთვის სასარგებლოდ ვთამაშობ, გუნდს კარგად ვიცავ და მეტოქეს გოლის გატანის საშუალებას არ ვაძლევ. ყველა მატჩში ეს მიზანი მაქვს."

წყარო: ManUtd.com