ჩემპიონთა ლიგის მოახლოებული მერვედფინალების მიმართ ყურადღება სულ უფრო და უფრო იმატებს. ევროპული საფეხბურთო სამყაროს უდიდესი ზეიმი 12 თებერვალს აიღებს სტარტს.

ფეხბურთის გულშემატკივრებისთვის უდიდესი ინტერესის საგანი "მანჩესტერ იუნაიტედისა" და ფრანგული "პსჟს" დაპირისპირება იქნება. ჟოზე მოურინიოს გუნდში ყოფნის დროს უკლებლივ ყველა ფავორიტად ტომას ტუხელის გუნდს თვლიდა, თუმცა სიტუაცია რადიკალურად "წითელი ეშმაკების" ახალმა მწვრთნელმა ოლე გუნარ სოლსკიაერმა შეცვალა. ბუკმეიკერულმა ორგანიზაციებმა ინგლისურ გიგანტს სათამაშო კოეფიციენტი მკვეთრად დაუგდეს.

ფავორიტად პსჟ-ს, გუნდის იტალიელი კიპერი ჯანლუიჯი ბუფონიც არ თვლის. ჯიჯიმ ჟურნალისტებისთვის მიცემულ ინტერვიუში განაცხადა, რომ შანსები თანაბარია და ამ წყვილში ფავორიტი არ არსებობს.

"ფსიქოლოგიურად გვაქვს გეგმა და ვიცით თუ საით უნდა წავიდეთ. სამშაბათს მნიშვნელოვანი თამაშია, სადაც უნდ ვაჩვენოთ შესანიშნავი თამაში. "მანჩესტერ იუნაიტედის" წინააღმდეგ თამაში რთული იქნება, მათ ჩვეულებრივზე უფრო ძლიერი ფეხბურთი უნდა დავუპირისპიროთ.

მე არ ვთვლი პსჟ-ს ფავორიტად, ამ კონფრონტაციაში შანსები თანაბარია". - ციტირებს Goal-ი ლეგენდარული მეკარის სიტყვებს.