გუშინ "მანჩესტერ იუნაიტედმა" "ბარნლისთან" ქულები დაკარგა. გულშემატკივარი იმედგაცრუებული დარჩა, ფრესა და წაგებაზე არავინ ფიქრობდა. ყველას სჯეროდა, რომ ოლე გუნარი პრემიერ ლიგის რეკორდის მოხსნას შეძლებდა და ის გახდებოდა პირველი მწრთვნელი ისტორიაში, რომელმაც ზედიზედ შვიდი მატჩის მოგება შეძლო. თუმცა "იუნაიტედმა" პირველი ტაიმი არცთუ ისე კარგად დაიწყო, რამაც თავისი შედეგები გამოიღო და სტუმრების დამარცხება ვერ შეძლო. "ეშმაკუნები" მხოლოდ ერთ ქულას დასჯერდნენ. ნორვეგიელი გუშინდელი დღით უკმაყოფილოა:
"ჩვენ თამაში დავიწყეთ იმ შეგრძნებით, რომ თითქოს წინა რვა თამაშში მოპოვებული გამარჯვებები ერთი ბურთით წინ ყოფნას უკვე ნიშნავდა. თუმცა ეს ასე არ ხდება. როცა თამაშის მოგება გსურს, ეს უნდა დაიმსახურო კიდეც და კარგად უნდა დაიწყო მატჩი. მათ ჩვენ ყველაფერი გაგვირთულეს, თუმცა მაინც მინდა აღვნიშნო, რომ საოცარი ქამბექი გავაკეთეთ."
მიღებული შედეგით კმაყოფილი არ გამოდგა არც შონ დაიჩიც. მისი განცხადებით, ორივე გოლი "იუნაიტედმა" წესების დარღვევით მიითვალა:
"ყველაზე მეტად დამატებითმა ხუთმა წუთმა გამაბრაზა. ძალიან დავიბენი. ვფიქრობ, ამ ყველაფერმა გულშემატკივრებსა და მოწინააღმდეგე მხარეს ენერგია შემატა. გარდა ამისა, საერთოდ არ მომწონს, როცა პენალტს მხარზე შეხების გამო ნიშნავენ ჩვენს კარში და მერე უცებ ეს ყველაფერი ერთად გატყდება თავზე. თუმცა ყველამ ვიცით, რომ ფეხბურთში მსგავსი რამეები ხდება. დღეს ყველაფერი ჩვენ წინააღმდეგ მოხდა. მეორე გოლზე სანჩესმა თავური მოიგო, ჰიტონმა სეივი გააკეთა და ვფიქრობ, ლინდელოფმა თამაშგარედან გაიტანა."