ნორვეგიელმა ბრაზილიელს მიმართა.
"მანჩესტერ იუნაიტედის" დროებით მწვრთნელი ოლე გუნარ სოლსკიაერი პირობას დებს, რომ ფრედი თავის გამოჩენის შანსს მიიღებს.
დონეცკის "შახტარიდან" შეძენილმა ფეხბურთელმა 15 მატჩი ჩაატარა "იუნაიტედის" შემადგენლობაში და უკანასკნელად მოედანზე "რედინგთან" შეხვედრაში გამოჩნდა.
სოლსკიაერს მიაჩნია, რომ შემადგენლობაში სხვადასხვა ფეხბურთელის გამწესებისას არავისთვის არ მიუნიჭებია უპირატესობა დაუმსახურებლად და აღნიშნავს, რომ ბრაზილიელმა კონკურენცია ნემანია მატიჩსა და ანდერ ერერას უნდა გაუწიოს.
კლუბის ისტორიაში ერთ-ერთი გამორჩეული თავდამსხმელი, რომელსაც დრო დასჭირდა ამ სტატუსის მოსაპოვებლად, აღნიშნავს, რომ სამხრეთ ამერიკელს სანერვიულო არაფერი აქვს, ვინაიდან თავის შანსს ამ სეზონში აუცილებლად მიიღებს.
როცა "ბარნლისთან" მატჩის წინა პრესკონფერენციაზე ოლე გუნარს ჰკითხეს, მისთვის გამოწვევა ხომ არ იყო ფრედის არჩევა შემადგენლობაში, ნორვეგიელმა უპასუხა:
"ვფიქრობ, შეკითხვა არასწორადაა დასმული, რადგან არ მიმაჩნია, რომ პირადი გამოწვევა ფეხბურთელების გამწესება. ფეხბურთელებზეა დამოკიდებული, იქნებიან თუ არა მზად შანსის გამოსაყენებლად და ფრედი ვარჯიშებზე ბევრს შრომობს, კარგი ბიჭია.
იგივე ეხება ანრეას პერეირასა და სკოტ მაკტომინეისაც, რადგან როცა ისინი შანსს მიიღებენ, ეს კი აუცილებლად მოხდება, პროგრესის ხილვის იმედი გვექნება. ჩვენ ვიცით, რომ ფრედის სახით ძალიან, ძალიან კარგი ფეხბურთელი გვყავს, ასე რომ, იმედია, ინგლისურ ფეხბურთს შეეგუება, ვინაიდან მისი ნიჭი არავითარ ეჭვს არ იწვევს.
აქ ჩამოსვლა და თამაში ყოველთვის რთულია. ერთია, "იუნაიტედში" თამაში და სტაბილურობის მოლოდინი. მეორე - ინგლისის ჩემპიონატი, რასაც მიჩვეული არ არის, მაგრამ ის ხომ ბრაზილიის ნაკრების წევრია. ანდრეასი - ასევე ბრაზილიის ნაკრების წევრია, ნიჭი მასაც აქვს და როცა ისინი შანსს მიიღებენ, დარწმუნებული ვარ, გამოიყენებენ კიდეც.
ადვილია ისეთ გუნდში გადასვლა, სადაც ყველაფერი კარგად მიდის. არავითარი პრივილეგია არ მიმინიჭებია ფრედისთვის, სკოტისთვის ან ადრეასისთვის, როცა "რედინგთან" ვათამაშე მატჩში, სადაც ცხრა ცვლილება იყო განხორციელებული. შემდეგ რომ ითამაშებენ, შესაძლოა, ერთი ან ორი ცვლილება განხორციელდეს შემადგენლობაში და ვნახოთ, რას შეძლებენ.
უამრავი ფეხბურთელი არსებობს, ვისაც პირველი რამდენიმე თვე გაუჭირდა. ორი საუკეთესო ფეხბურთელი, ვისაც ასე უჭირდა და ვისთან ერთადაც მითამაშია, დიეგო ფორლანი და ხუან სებასტიან ვერონი იყვნენ, რომლებიც შესანიშნავი მოთამაშეები არიან და როგორც კი თავი დაიმკვიდრეს, მაშინვე დაიწყეს კარგად თამაში. არა მგონია, რამე სანერვიულო ჰქონდეს, თავის შანსს მიიღებს."ფრედი, დიდი ალბათობით, "ბარნლისთან" მატჩის განაცხადში იქნება, სადაც "წითლები" მორიგი შეხვედრის მოგებას და ცხრილში მაღლა ასვლას ეცდებიან. მიუხედავად იმისა, რომ სოლსკიაერის მოსვლის შემდეგ ბევრი საუბარია ოთხეულში მოხვედრაზე, დროებით მწვრთნელს უფრო დიდი ამბიციები აქვს.
"ჩვენ ჩემპიონთა ლიგასა და ინგლისის თასზე ვთამაშობთ. ვერ ვიფიქრებთ მხოლოდ ოთხეულზე, უნდა ვეცადოთ წელს რამის მოგებას. როგორც უკვე ვთქვი, ყოველ მატჩს ისე ვუდგები, როგორც "მანჩესტერ იუნაიტედის" მწვრთნელს შეეფერება - ვფიქრობ, რომ მოგება შეგვიძლია".წყარო:
manutd.com