ოლე გუნარ სოლსკიაერი იმედოვნებს, რომ "მანჩესტერ იუნაიტედი" სულ ცოტა ხანში ბევრ ახალ კონტრაქტს გააფორმებს.
"იუნაიტედმა" უკვე დაადასტურა, რომ სკოტ მაკტომინეისთან ახალ, 4-წლიან კონტრაქტს მოაწერა ხელი, თუმცა ანდერ ერერას, ხუან მატასა და ეშლი იანგის შესახებ არაფერი ისმის. შეგახსენებთ, რომ ტრიოს ძველი კონტრაქტი სეზონის ბოლოს ეწურებათ.
კლუბმა უკვე გამოიყენა კონტრაქტის ერთი წლით გახანგრძლივების შესაძლებლობა დავიდ დე ხეასა და ენტონი მარსიალის შემთხვევაში. ესპანელი და ფრანგი "ოლდ ტრაფორდზე" 2020 წლამდე დარჩებიან, თუმცა ხელმძღვანელობა მათთვის ახალი კონტრაქტის შეთავაზებას აქტიურად ცდილობს.
კრის სმოლინგმა და ლუკ შოუმ ახალი კონტრაქტი უკვე გააფორმეს, სოლსკიაერმა კი დე ხეას, მარსიალისა და მატას კონტრაქტებზე ისაუბრა.
"ვფიქრობ, ხელმძღვანელობა ამ ყველაფერზე მუშაობს და პროგრესიც შეიმჩნევა, თუმცა ამაზე მეტს ვერაფერს გეტყვით და უბრალოდ მათ მივცემ ლაპარაკის საშუალებას, ვისაც უშუალოდ ეს საქმე ეხება. ვერც იმას გეტყვით რამდენად ახლოს ან შორს ვართ ახალი კონტრაქტის გაფორმებისგან, თუმცა ვიმედოვნებ, რომ შემდეგ კვირებში კარგი ამბებით დაგიბრუნდებით."