"მანჩესტერ იუნაიტედის" გმირი, დავიდ დე ხეა, აცხადებს, რომ გუშინდელი გამარჯვება მხოლოდ დავიდის დამსახურება არ არის და დაცვამ ამ ყველაფერში დიდი წვლილი შეიტანა.
დავიდ დე ხეა მატჩის საუკეთესო ფეხბურთელი გახდა, მან ხმათა 91% მიიღო. ეს მოსალოდნელიც იყო, რადგან ესპანელმა მსოფლიო კლასის დონის სეივები გააკეთა და გუნდს, ფაქტობრივად, სამი ქულა მარტომ მოუტანა.
მფრინავმა ესპანელმა საერთო ჯამში 11 სეივი განახორციელა. ამით მან რეკორდულ მაჩვენებელს მიაღწია, რადგან აქამდე "პრემიერ ლიგის" ერთ მატჩში არცერთ მეკარეს არ განუხორციელებია ამდენი სეივი.
"ჩვენ უბრალოდ უნდა მოგვეგო. პირველ ტაიმს კარგად ვაკონტროლებდით, ხოლო მეორე ნახევარში დიდი წნეხის ქვეშ მოგვიწია ყოფნა. მათ ბევრი შანსები ჰქონდათ, თუმცა ჩვენ, როგორც გუნდმა, ძალიან კარგად მოვახერხეთ თავის დაცვა და, შესაბამისად, სამი ქულაც მოვიპოვეთ."
"პირველი ორი სეივის შემდეგ ძალიან კარგად ვგრძნობდი თავს. რამდენიმე მათგანი არც კი მახსოვს, ასე რომ ვერც კი გეტყვით, რომელი იყო ჩემთვის საუკეთესო სეივი. აუცილებელი იყო კარის მშრალად შენახვა, ასე რომ ყველა სეივი მნიშვნელოვანი იყო. ეს ყველასთვის რთული მატჩი იყო. კარგად ვუტევდით, ბევრი მომენტი შევქმენით - ეს არის "იუნაიტედი".
"ვიქტორ ლინდელოფმა და ფილ ჯონსმა უმაღლეს დონეზე ითამაშეს. მხოლოდ მათ არა, მთლიანმა გუნდმა ძალიან კარგად ითამაშა. ჩვენ ეს დონე უნდა შევინარჩუნოთ და რაც შეიძლება მეტი მატჩი მოვიგოთ. აუცილებელია, რომ ოთხეულისთვის ბოლომდე ვიბრძოლოთ."
"ძალიან ლამაზი გოლი გავიტანეთ, თუმცა მეორე ნახევარში დიდი წნეხის ქვეშ მოგვაქციეს. "ტოტენჰემი" ძალიან კარგი გუნდია და შესაბამისადაც ითამაშეს. ბევრი მომენტი შექმნეს და ვფიქრობ, რომ ძალიან კარგად დავიცავით თავი. მიმაჩნია, რომ სამ ქულას ვიმსახურებდით და შედეგით ძალაინ ბედნიერები ვართ ყველა."
"ჩვენ დუბაიში ბევრი ვიმუშავეთ. შეტევებზე, სწრაფ გადაცემებზე, ყველაფერზე ვივარჯიშეთ. საერთო ჯამში, ფანტასტიკური გოლი გამოვიდა. დუბაიში დასასვენებლად ნამდვილად არ ვყოფილვართ. ძალიან, ძალიან ბევრი ვიმუშავეთ, რაც ჩვენ შეგვეტყო. დღეს ბრწყინვალენი ვიყავით."
"ძალიან მნიშვნელოვანია კლუბისთვის, ფეხბურთელებისთვის და საერთოდ ყველასთვის, რომ ოთხეულში მოვხვდეთ და "ჩემპიონთა ლიგაზე" ვითამაშოთ. ჩვენ ამისთვის ვიბრძვით და კარგია, როცა გუნდი ასე თამაშობს. ოლეს კლუბში ბედნიერება მოაქვს. ფეხბურთელები კარგად თამაშობენ, გუნდი გაძლიერებულია. ვიცით, როგორ უნდა ვაკონტროლოთ თამაში, როგორ შევინარჩუნოთ გუნდი, როგორ შევქმნათ მომენტები და ეს ჩვენთვის ძალიან კარგია. ეს არის ნამდვილი "მანჩესტერ იუნაიტედი".
დე ხეას თამაში შეუმჩნეველი არ დარჩენიათ მის თანაგუნდელებს. ყველა ფეხბურთელი და მენეჯერიც კი მატჩზე საუბრობდნენ.
მარკუს რეშფორდი: "დღევანდელი დღე გოლებზე არ იყო, დღევანდელი დღე მეკარეზე იყო, რომელმაც უბრალოდ საოცრებები ჩაიდინა. ჩვენ ყველამ ვიცით, რომ უკან დავიდი დგას. ახლაც გაოცებული ვარ. როცა დე ხეა გიდგას უკან, ეს თავდაჯერებას გმატებს."
ანდერ ერერა: "როდესაც გოლი გაგაქვს მეტი თავდაჯერებითა და რწმენით თამაშობ. მე-60 წუთამდე თავისუფლად შეგვეძლო მეორე გოლის გატანაც, თუმცა მომენტები ვერ გამოვიყენეთ. შემდგომ უკვე ყველაფერი დავიდზე იყო. ის ნომერ პირველია. ასეთი არასდროს არაფერი მინახავს. დაუჯერებელი იყო. ერთადერთი, რაც შეგვიძლია გავაკეთოთ არის ის, რომ დე ხეას მატჩით სიამოვნება მივიღოთ."
ჯესი ლინგარდი: "დავიდი ბრწყინვალე იყო. თუმცა ეს მისთვის ერთი ჩვეულებრივი დღეა. ის თავის სიმაღლეზე რჩებოდა და ყველაფერს აკონტროლებდა. მისი სეივები ბევრი გოლის ტოლფასი იყო."
ოლე გუნარ სოლსკიაერი: "დავიდი ფანტასტიკური იყო. როდესაც 11 სეივს აკეთებ ეს უბრალოდ დაუჯერებელია. ორმა სეივმა გაოგნებული დამტოვა, დანარჩენი დე ხეასგან მოსალოდნელი იყო. ის მსოფლიოში ნომერ პირველია, ეს ბევრჯერ მითქვამს და კიდევ ბევრჯერ გავიმეორებ. ორი ბურთი ახლაც არ ვიცი როგორ აიღო. ის უბრალოდ ყოველთვის სწორ დროს სწორ ადგილასაა. არცერთი მომენტი არ ეპარება, ყოველთვის მოძრაობს. ხანდახან მისი სეივები მარტივი გვეჩვენება, მაგრამ ვერ ვიაზრებთ, რომ ეს მხოლოდ იმიტომ, რომ მან, უბრალოდ, იცის როდის რა პოზიციაზე უნდა იდგეს."