ოლე გუნარ სოლსკიაერს სწამს, რომ მისი მოსვლის შემდეგ ალექსის სანჩესისთვის ახალი ცხოვრება დაიწყო. გულშემატკივარი ჩილელის ფორმის პიკს სულ მალე იხილავს.
"იუნაიტედის" 7 ნომერს 14 მატჩის გამოტოვება მოუწია ბარძაყის ტრავმის გამო. დეკემბერში კი ვერცერთი თამაში ვერ ჩაატარა.
დაბრუნებიდან ჩილელმა უკვე ორი ასისტი მიითვალა და "ნიუკასლსა" და "რედინგთან" გამარჯვებაში მიიღო მონაწილეობა.
იმედია, ფორვარდი დღევანდელი მატჩისთვის მზად იქნება. "უემბლიზე" მას საოცარი შედეგი აქვს - 8 გოლი 8 მატჩში.
ხუთშაბათის პრესკონფერენციაზე ოლე გუნარმა ალექსის სანჩესის შესახებ ისაუბრა. "მას საკუთარი თავისთვის თავადვე აქვს წაყენებული მაღალი სტანდარტები. როდესაც ასე რთული ეტაპის გავლა გიწევს და პლიუს რამდენიმე მატჩის გამოტოვება, რთულია, რომ შენს თავში რწმენა და თავდაჯერებულობა ისევ აღმოაჩინო. "
"ასე რომ, მე მასთან ბევრი ვისაუბრე პირადად. მისთვის ეს ახალი დასაწყისია. ჩემი და მაიკის მოსვლის შემდეგ მის კარიერაში ახალი ერა იწყება. ვიმედოვნებ, რომ მისგან საუკეთესოს ვიხილავთ, რადგან ის უმაღლესი კლასის ფეხბურთელია."
"ჩვენ, რა თქმა უნდა, ტრავმასთან დაკავშირებული პრობლემები გვქონდა. ტრავმიდან გამომდინარე მას არ ჰქონია შანსები იმისა, რომ დაემტკიცებინა თუ რა შეუძლია. ჯერ კიდევ ბევრი დრო დასჭირდება სრულად გამოსაჯანმრთელებლად და საკუთარი შესაძლებლობების ხალხისთვის საჩვენებლად. შემდგომ ყველა ერთად ვიხილავთ თუ რა შეუძლია ალექსისს."