მსოფლიო ჩემპიონატის გამარჯვებულმა "იუნაიტედში" არსებულ სიტუაციაზე ისაუბრა. მისი განცხადებით, ოლე გუნარის მოსვლის შემდეგ მან ფეხბურთით სიამოვნების მიღება დაიწყო. ნორვეგიელის მოსვლის შემდეგ, ფრანგმა ოთხი გოლის გატანა მოახერხა და რამდენიმე ასისტიც მიითვალა.
"ახლანდელ სიტუაციაში ძალიან კარგად ვგრძნობ თავს. ნოემბრამდე ბევრს არ ვთამაშობდი, მოედანზე დაბრუნება, ამდენი სათამაშო დრო და ბიჭებთან ერთად ფეხბურთისგან სიამოვნების მიღება ძალიან კარგია."
პოგბამ ბოლო ფორმიდან გამომდინარე, დეკემბრის საუკეთესო ფეხბურთელის ტიტული მოიგო. როგორც უკვე აღვნიშნეთ, ფრანგმა ოთხი გოლის გატანა მოახერხა. ჟურნალისტებმა ჰკითხეს, თუ რომელ გოლს გამოარჩევდა ამ ოთხი გოლიდან, რაზეც შემდეგი პასუხი მიიღო:
"ალბათ, "ბორნმუთთან" თავით გატანილი გოლი. სწორი დრო შევარჩიეთ, ანდერ ერერამაც კარგად გადაჭრა და საერთო ჯამში ლამაზი გოლი გამოვიდა."
პოგბამ "ნიუკასლთან" ჩატარებულ მატჩში ტრავმა მიიღო და, შესაბამისად, "ინგლისის თასის" თამაშის გამოტოვება მოუწია. თუმცა ფრანგს ერთი სული აქვს როდის დაბრუნდება და "იუნაიტედს" ზედიზედ მეექვსე გამარჯვებას მოუტანს.
"ჩვენ "მანჩესტერ იუნაიტედი" ვართ, ასე რომ გამარჯვება ჩვენი მთავარი მიზანი უნდა იყოს,"-დაამატა პოგბამ.
"ჩვენ ყველამ კარგად ვიცით, რომ "პრემიერ ლიგა" ძალიან რთული ჩემპიონატია და ჯერ კიდევ ძალიან ბევრი თამაში გვაქვს წინ, თუმცა ეს ხუთი თამაში თავდაჯერებულობას გვმატებს."
"ფსიქოლოგიურად გაძლიერებულები და მზად ვართ. მთელი სეზონის განმავლობაში გვინდა, რომ იგივე ვაკეთოთ და ასე განვაგრძოთ თამაში."
"იუნაიტედი" "პრემიერ ლიგაში" კვლავ მეექვსე ადგილზე იმყოფება, თუმცა უკვე ოთხეულისგან უკვე მხოლოდ 6 ქულა აშორებს.