"მანჩესტერ იუნაიტედის" მენეჯერმა, ოლე გუნარ სოლსკიაერმა, ოთხშაბათს გასამართი მატჩის შესახებ ისაუბრა. ნორვეგიელმა საზოგადოებას წინასწარი ცნობები მიაწოდა სასტარტო თერთმეტეულის შესახებ. ერთი ფეხბურთელი, რომელიც დანამდვილებით გამოტოვებს მატჩს ერიკ ბაიია. შეგახსენებთ, რომ მან "ბორნმუთთან" წითელი ბარათი მიიღო.
მათეო დარმიანი და ფილ ჯონსი ვიქტორ ლინდელოფთან ერთად მზად არიან მოედანზე გამოსასვლელად. რაც შეეხება კრის სმოლინგს, ის შესაძლოა, "ტოტენჰემთან" მატჩისთვის დაბრუნდეს. როხო კი კვლავ ვერ ახერხებს ლაზარეთის დატოვებას. როდესაც ჰკითხეს ორი მცველით შეძლებდა თუ არა თამაშს, სოლსკიაერმა შემდეგი პასუხი გასცა:
"ეს საკმარისია, თქვენ ასე არ ფიქრობთ? ორი სრულიად საკმარისია! რა თქმა უნდა, ჯერ კიდევ დროა და რაღაცებს უნდა გადავხედოთ, მაგრამ გვყავს დარმიანი, რომელსაც შეუძლია ცენტრში თამაში. არ მგონია, რომ როხომ დაბრუნება შეძლოს, ასე რომ ერთ-ერთ ცენტრალურ მცველად აუცილებლად დარმიანს იხილავთ."
ჩილელი ვარსკვლავი "ნიუკასლთან" მატჩისთვის მზად იქნება. ნორვეგიელი კი მას შანსს მისცემს.
"ალექსისმა დიდებული ვარჯიშები ჩაატარა ბოლო დღეების განმავლობაში. ძალიან უნდოდა "ბორნმუთთან" თამაში, მაგრამ ჯერ ადრე იყო. ის ერთი თვე ვერ თამაშობდა, ამიტომაც საჭიროდ აღარ ჩავთვალე მისი ჩართვა გასულ თამაშში. თუმცა "ნიუკასლთან" აუცილებლად ითამაშებს."
"სანჩესი იმ ფეხბურთელთა კატეგორიას მიეკუთვნება, ვისაც სულ სურს თამაში. კიდევ ერთხელ ვიმეორებ, რომ "ბორნმუთთანაც" სურდა, თუმცა რამდენიმე დღე კიდევ სჭირდებოდა."
მარკუს რეშფორდი კი საოცარ ფორმაშია და რომელუ ლუკაკუსთან ერთად "ნიუკასლის" წინააღმდეგ ითამაშებს.
"ვფიქრობ, მარკუსი მომჯობინდება. ის ძალიან ბევრს მუშაობდა და ცოტათი დაიღალა კიდეც. თუმცა ვფიქრობ და ვიმედოვნებ, რომ "ნიუკასლისთვის" უკვე მზად იქნება."