ხუან მატას სურს, რომ 2018 წელი მაღალი განწყობით დაასრულოს, რაც "ბორნმუთის" დამარცხებას გულისხმობს. თუმცა ესპანელისთვის მხოლოდ გამარჯვება საკმარისი არაა, მას კარგი ხარისხის მატჩი სურს.

"იუნაიტედს" ამ სეზონში პირველად აქვს შანსი, რომ სამი თამაში ზედიზედ მოიგოს და შესაბამისად გულშემატკივარს საოცრად აგრძნობინოს თავი.

ხუანმა "ჰადერსფილდთან" გამართულ მატჩშიც მიიღო მონაწილეობა, სადაც გულშემატკივრებმა კიდევ ერთხელ საოცარი მხარდაჭერა გამოიჩინეს.

"ეს დღე ყოველთვის განსაკუთრებულია ხოლმე. სტადიონზე ძალიან ბევრ ბავშვს შენიშნავთ ოჯახთან ერთად და თან მშვენიერ საშობაო ატმოსფეროსაც შეიგრძნობთ."

"ჩვენი გულშემატკივრები უბრალოდ დაუჯერებლები არიან. ჩემი მოსვლის დღიდან ბევრი რამ გავიარეთ, რაც კარგ და ცუდ მომენტებსაც მოიცავს. მარტივია, რომ გუნდს გვერდში დაუდგე, როცა ის წარმატებულია, როცა ის თავისი ფორმის ზენიტშია. მთელი ხიბლი გუნდის გვერდში დგომაშია სწორედ მაშინ, როცა ის რთულ პერიოდს გადის. ჩვენი გულშემატკივრები ყოველთვის ჩვენ გვერდით იდგნენ, რაც არ უნდა ცუდ სიტუაციაში ვყოფილიყავით და ეს საოცარი, საოცარი გრძნობაა. ყველა შენ გვერდითაა, გგულშემატკივრობს, გელოდება და შენს იმედს არასდროს კარგავს. ელოდებიან, როდის დაბრუნდება დიდებული დრო და მთავარია, რომ მათ ამ ყველაფრის სჯერათ."

"ეს არის ნამდვილი გულშემატკივრობა და ჩვენ გვაქვს ბედნიერება, რომ გვყავდეს ასეთი გულშემატკივრები. ჩვენთვის დიდი პრივილეგიაა ასეთი გულშემატკივრების ყოლა. როცა ვიმარჯვებთ და ისინი ბედნიერები არიან, მეც ვბედნიერდები, რადგან ისინი ამ კარგ მომენტებს, დიდებულ გამარჯვებებს ნამდვილად იმსახურებენ."

როდესაც ხუანს ჰკითხეს თუ რა ისწავლა "ბორნმუთთან" ჩატარებულ მატჩში ესპანელმა შემდეგი პასუხი გასცა:

"ჩვენ ბოლო მომენტამდე უნდა ვიბრძოლოთ გოლის გასატანად, როგორც ეს მარკუსმა გააკეთა. ეს ლამაზი და რთული მატჩი იყო."

"მე ძალიან მომწონს "ბორნმუთი", მათ კარგი მენეჯერი ჰყავთ, ერთი კონკრეტული მიმართულებით თამაშობენ და ყველაფერს აკეთებენ, რათა უფრო და უფრო უკეთესები გახდნენ. მათ მოსწონთ, როცა ბურთს ფლობენ და თამაშს აკონტროლებენ. საბოლოოდ, ძალიან ძალიან კარგი გუნდი გახლავთ."

"ჩვენ ისევ "ოლდ ტრაფორდზე" ვთამაშობთ და ყველანაირად ვეცდებით, რომ დავანახოთ ხალხს თუ როგორი ძლიერები ვართ სახლში. ჩვენი გულშემატკივრები ჩვენთვის დამატებითი ძალაა. თუმცა ეს იმას არ ნიშნავს, რომ ჩვენ მათ არაფრად ვაგდებთ. პირიქით, ძალიან დიდ პატივს ვცემთ მენეჯერსაც და კლუბსაც. ერთი სული მაქვს, როდის დავბრუნდებით "ოლდ ტრაფორდზე" და კიდევ სამ ქულას მოვიპოვებთ."


წყარო: ManUtd.com