"წითელი ეშმაკების" პასუხი "იუვენტუსს".
ზამთრის სატრანსფერო ფანჯრის მოახლოებასთან დაკავშირებით, სატრანსფერო ჭორების ციებ ცხელება სულ უფრო აქტიური ხდება. საფეხბურთო ტაბლოიდები "მანჩესტერ იუნაიტედის" ფრანგი ნახევარმცველის პოლ პოგბას შესახებ აქტიურად წერენ.
ზოგი მას იტალიაში გადაბარგებას უწინასწარმეტყველებს, ზოგნი კი სულაც მის ამჟამინდელ კლუბში დარჩენას. სწორედ ასეთი გამოცემაა Calciomercato - რომელიც დღეს ავრცელებს ინფორმაციას იმის შესახებ, რომ ინგლისური გრანდი, სულაც არ გეგმავს ფრანგი ნახევარმცველის იტალიაში დაბრუნებას.
აღნიშნული წყაროს ცნობით, "ოლდ ტრაფორდის" ბოსებსა და ფეხბურთელის წარმომადგენლებს შორის მოლაპარაკებები მალე განახლდება, განხილვის საგანი კი პოლ პოგბასთვის შეთავაზებული ახალი გრძელვადიანი კონტრაქტი იქნება.
მიმდინარე სეზონში, ფრანგმა "წითლების" რიგებში 22 შეხვედრა ჩაატარა, საკუთარ აქტივს კი 7 გოლი და 6 საგოლე გადაცემა შესძინა. მიმდინარე კონტრაქტი პოლს "იუნაიტედთან" 2021 წლამდე აკავშირებს.
როგორც ჩანს, ეს იქნება ინგლისური გრანდის პასუხი ტურინის "იუვენტუსს", რომელიც ამ დრომდე ცდილობს ნახევარმცველის იტალიაში დაბრუნებას.
წყარო:
euro-football