ოლე გუნარ სოლსკიაერმა "ჰადერსფილდთან" გამართულ მატჩზე ისაუბრა. ნორვეგიელმა განსაკუთრებით დავიდ დე ხეა შეაქო.
დავიდ დე ხეას საოცარი სეივი
"შედეგი საოცარი იყო. კარგია მატჩის მოგება და სამი ქულის მოპოვება. ნელა დავიწყეთ და ამიტომაც მოხდა, რომ ბევრი მომენტები ვერ შევქმენით, თუმცა პირველი გოლის შემდეგ უკეთესად ავთამაშდით. დავლაგდით და უფრო სწრაფი თამაში დავიწყეთ. მეორე ტაიმის პირველი 7-8 წუთიც გაგვიჭირდა, მაგრამ დავიდის სეივი ჩვენთვის გადამწყვეტი მომენტი აღმოჩნდა. არ აქვს მნიშვნელობა ვის ეთამაშები, ყველას შეუძლია მომენტების შექმნა. დავიდმა კი საოცრად ითამაშა, ეს შესანიშნავი სეივი იყო. ერთ-ერთი საუკეთესო, რაც მინახავს. შეიძლება ითქვას, რომ საუკეთესოც კი."
ცვლილებების მიზეზი
"მეორე ტაიმის დაწყება ძალიან გაგვიჭირდა. გამოცდილი ფეხბურთელები იყო საჭირო, ამიტომაც ავირჩიე ეშლი იანგი და ანდერ ერერა. ვფიქრობ, მათმა შემოსვლამ ყველაფერი დააწყნარა."
პოგბა ისევ შთამბეჭდავია
"ძალიან სასიამოვნო იყო მისგან ორი გოლის ხილვა. "კარდიფთან" გოლების შექმნაში მონაწილეობა მიიღო, ახლა კი თავად გაიტანა. დარწმუნებული ვარ, უფრო და უფრო კარგ ფორმაში ჩადგება და გუნდთან ერთად განვითარდება. ბოლოსკენ დაღლილები ვიყავით. ძალიან მნიშვნელოვანია, რომ შემდეგი ორი-სამი დღე მოვმჯობინდეთ და "ბორნმუთს" მომზადებულები დავხვდეთ."
განწყობის ცვლილება
"ერთ კვირაში არაფრის შეცვლა არ შეგიძლია, მაგრამ შეგიძლია შენს განწყობაზე იმუშავო. მინდა, რომ ჩემმა გუნდმა კონკრეტული მიმართულებით ითამაშოს და ამისთვის პატარ-პატარა მითითებებს აქა-იქ სულ ვაძლევ. ეს ყველაფერი უკვე პროგრესშია. ეს ყველაფერი დროს წაიღებს, რადგან ერთი მენეჯერიდან მეორეზე გადაწყობა ფეხბურთელებისთვის ძალიან რთულია. დროთა განმავლობაში ყველაფერი დალაგდება."
გულშემატკივრები შენს სახელს სკანირებენ
"მოედანზე შესვლის მომენტი ძალიან საამაყო იყო. სიმართლე რომ გითხრათ, გამიკვირდა, რომ ასე მშვიდი და გაწონასწორებული ვიყავი თამაშისთვის. განსაკუთრებული გრძნობა იყო "ოლდ ტრაფორდზე" შესვლა და ჩემი სახელის მოსმენა. ჩვეულებრივ, ისინი ამას გოლის ან რაიმე განსაკუთრებულის შემდეგ იწყებენ და არა თამაშის დასაწყისში. ეს საოცარი შეგრძნება იყო და მართლა ძალიან დიდი სიამაყის გრძნობით აღვივსე. ვიმედოვნებ, რომ ჩემი ოჯახიც ამაყობს ჩემით. პირველი ორი თამაში არასდროს, არასდროს არ დამავიწყდება. ძალიან დიდი სიამოვნება მივიღე ამ ყველაფრით."