"პარი სენ-ჟერმენის" ვარსკვლავი ნეიმარი ჟოზე მოურინიოს გაძევების შემდეგ კომენტარს აკეთებს და აცხადებს, რომ "მანჩესტერ იუნაიტედს" გარკვეული საფრთხის შექმნა შეუძლია მისი გუნდისთვის ჩემპიონთა ლიგის მერვედფინალში.
მიმდინარე სეზონის 17 ტურის შემდეგ პორტუგალიელი მწვრთნელი "იუნაიტედის" მწვრთნელის პოსტიდან დაითხოვეს, ვინაიდან მისი გუნდი არადამაჯერებელი თამაშის გარდა საგრძნობლად ჩამორჩებოდა მეტოქეებს ქულათა რაოდენობით.
მოურინიოს შემცვლელად ოლე გუნარ სულშერი დასახელდა, თუმცა მას მხოლოდ დროებითი მწვრთნელის როლი ერგო და ზაფხულში მის ადგილს სხვა მწვრთნელი დაიკავებს.
კლუბის ლეგენდა "იუნაიტედის" გულშემატკივარს ყველაზე კარგად 1999 წლის ჩემპიონთა ლიგის ფინალიდან ახსოვს და იმედოვნებენ, რომ 6-თვიანი მუშაობის პერიოდში ნორვეგიელი კვლავ შეძლებს დასამახსოვრებელი მოვლენების ჩუქებას.
ჩემპიონთა ლიგის მერვედფინალურ ეტაპზე "იუნაიტედის" მეტოქე საფრანგეთის ჩემპიონი იქნება, რომლის თავდამსხმელ ნეიმარსაც სჯერა, რომ სულშერის ხელმძღვანელობისას "წითლები" სულ სხვა ფეხბურთს ითამაშებენ.
"ვიცით, რა უნარებიც აქვს "მანჩესტერ იუნაიტედს" და ისიც, რომ ფეხბურთელები გამარჯვებულის მენტალიტეტით თამაშობენ.
მწვრთნელი შეცვალეს და სათამაშო სტილიც შეიცვლება - ისინი ცვლილებების პროცესში არიან - მაგრამ ვიცით, რაც შეუძლიათ.
მიყვარს დიდი მატჩები და ყოველთვის სიამოვნებაა მათში მონაწილეობა. ბედნიერი ვარ, რომ "მანჩესტერ იუნაიტედს" შევხვდით", - განაცხადა ბრაზილიელმა.