ჟოზე მოურინიო დაჟინებით აცხადებს, რომ "მანჩესტერ იუნაიტედი" მის წარსულში დარჩა. პორტუგალიელი მედიასთან არცერთი დეტალის განხილვას არ აპირებს.

შეგახსენებთ, რომ მოურინიო "იუნაიტედის" ხელმძღვანელობამ სამშაბათს დაითხოვა. როგორც პრესაში იწერება, პორტუგალიელმა 22 მილიონი ფუნტის ოდენობის კომპენსაცია მიიღო.

"იუნაიტედის" ყოფილი მენეჯერი ოჯახს ლონდონში სამშაბათსვე დაუბრუნდა. ჟურნალისტებმა ის სასტუმროს მიმდებარე ტერიტორიაზე შენიშნეს და კითხვების კორიანტელი დააყარეს.

როდესაც ჟურნალისტებმა მოურინიოს მიმდინარე მოვლენების შესახებ აზრის გამოთქმა მოსთხოვეს, პორტუგალიელმა შემდეგი პასუხი გასცა:

"მე არ ვიცვლები. რაც გავაკეთე "ჩელსის" დატოვებისას იგივეს ვიზამ ახლაც. მე მხოლოდ კარგ მომენტებს ვიტოვებ და საერთოდ არ მსურს ლაპარაკი ბოლოდროინდელ მოვლენებზე. ჩვენ ბევრ სასიამოვნო და არასასიაოვნო მომენტზე შეგვიძლია საუბარი, მაგრამ ეს ყველაფერი უკვე წარსულია. "მანჩესტერ იუნაიტედი" განაგრძობს ცხოვრებას ჩემ გარეშე და მე "მანჩესტერ იუნაიტედის" გარეშე."

"რატომ უნდა გაგიზიაროთ ჩემი გრძნობები ან თქვენ ან გულშემატკივრებს? ეს დასასრულია და მორჩა. მე ასეთი ვარ და ყოველთვის ასეთი ვიქნები. სულ ვაკრიტიკებდი მენეჯერებს, რომლებიც კლუბს ტოვებდნენ და შემდეგ შიდა დეტალებს განიხილავდნენ. მე მსგავსი რამეები არ მჩვევია."

"მინდა, რომ ძალიან მარტივად დავასრულო ყველაფერი. როგორც ხშირად აღმინიშნავს ახლაც მსგავსად ვიტყვი - "თამაში დასრულებულია." იმედი მაქვს, რომ მედიის წარმომადგენლები ამ ჩემს გადაწყვეტილებას პატივს სცემთ. სანამ საფეხბურთო სამყაროს დავუბრუნდები, უფლება მაქვს, რომ ჩემი ნორმარული ცხოვრებით ვიცხოვრო, ასე რომ გთხოვთ, მომეცით ამის საშუალება. ახლა ცოტა ხნით მაღაზიებს მოვივლი, გავისეირნებ და "მანჩესტერ იუნაიტედი" წარსულში დარჩება."

მოურინიომ გასულ სეზონში "იუნაიტედს" "ლიგის თასისა" და "ევროპის ლიგის" ტიტულები მოაგებინა. თუმცა ამჟამად "წითლები" სავალალო მდგომარეობაში იმყოფებიან, რაც პორტუგალიელის განთავისუფლების საფუძველი გახდა.


წყარო: M.E.N.