რეშფორდი დიდი ხანია "იუნაიტედის" აკადემიაში იმყოფება. ამ პერიოდის განმავლობაში ინგლისელს "ლივერპულთან" მრავალჯერ მოუწია დაპირისპირება. ახალგაზრდა ფორვარდი "იუნაიტედისა" და "ლივერპულის" მატჩის მნიშვნელობაზე საუბრობს.
"ეს არასდროს არავის უთქვამს ჩემთვის და არც იყო საჭირო. პირველივე "ლივერპულთან" გამართულ მატჩში, როცა მხოლოდ 9 წლის ვიყავი, ამ ყველაფერს მთელი სიმძაფრით ვგრძნობდი."
"ჩემი ოჯახი ან ხალხი ჩემ ირგვლივ ყოველთვის ამ ატმოსფეროში ცხოვრობდა. ამ თამაშებზე წლებია დადიან, თუმცა არცერთს არ უთქვამს ჩემთვის რას ნიშნავდა "ლივერპულის" წინააღმდეგ თამაში, რადგან იმ წამიდან რა წამიდანაც სტადიონზე ფეხს ადგამ, შენ ყველაფერს გრძნობ. მხოლოდ რამდენიმე თამაშია, რომელსაც ეს განსაკუთრებული შეგრძნება თავისთავად დაჰყვება."
"ჩვენ გამარჯვება გვსურს. მესმის, რომ რამდენიმე თამაში ფრედ ვითამაშეთ, თუმცა ეს არ ნიშნავს იმას, რომ ფეხბურთელებს მოგება არ უნდათ. საერთოდ არ გვსურს რომ წავიდეთ "ენფილდზე", ვითამაშით ფრე და დავბრუნდეთ უკან. არა, მხოლოდ გამარჯვება გვსურს და მჯერა, რომ ამის ძალა გვეყოფა. ამის მწამს მე და მთლიან გუნდს, სწორედ ამ შემართებით დავიწყებთ თამაშს. არ უნდა ვიჩქაროთ, ემოციებს არ უნდა ავყვეთ, მხოლოდ გავიმარჯვოთ."
რეშფორდმა ბოლო მატჩში "ლივერპულს" ორი გოლი გაუტანა, ახალგაზრდა ინგლისელი იმედოვნებს, რომ დღესაც იგივეს შეძლებს.
"ეს ძალიან განსაკუთრებული შეგრძნება იყო ჩემთვის. მეტიც, ეს ყველაზე დიადი შეგრძნება იყო იმათ შორის, რაც კი "ოლდ ტრაფორდზე" ოდესმე განმიცდია. იმ დღეს მოედანზე გამეფებული ატმოსფერო უბრალოდ დაუჯერებელი, გიჟური იყო. ეს არის მომენტი, რომელიც მთელი ცხოვრება გამყვება."
"თუ "ენფილდზე" კარგ შედეგს დავდებთ, ფსიქიკურად ფეხბურთელები და სამრწთვნელო შტაბი ძალიან გაძლიერდება და იქნებ სეზონის შემობრუნებაც შევძლოთ. იქნებ უფრო სტაბილურები გავხდეთ, უფრო ჟინიანები და მივიღოთ ის შედეგი, რაც ყველას სურს."
"თუმცა ამ წუთას, მიმაჩნია, რომ სხვა გუნდებზე კონცენტრაცია არასწორია. ახლა ერთადერთი დავალება გვაქვს - ყოველ წუთს უფრო და უფრო უკეთ წარვდგეთ გულშემატკივრის წინაშე. ჩვენ ბრძოლა უნდა განვაგრძოთ, რათა იმ სიტუაციას თავი დავაღწიოთ, რომელშიც ბოლო დროს აღმოვჩნდით."
რეშფორდი ბოლო დროს საოცარ თამაშებს ატარებს. აღნიშნული არ გამორჩენია მოურინიოსაც, რომლის შექებაც ხშირად დაიმსახურა ინგლისელმა. პორტუგალიელმა უკვე დაადასტურა, რომ მარკუსი "ლივერპულთან" წინააღმდეგ მატჩს სასტარტო შემადგენლობაში დაიწყებს. მისი თამაშიდან გამომდინარე, ის "ენფილდისთვის" ყველაზე საშიშ ფიგურად უნდა იქცეს.