"იუნაიტედის" დამარცხების წყალობით ჯგუფში პირველ ადგილზე "იუვენტუსი" გავიდა. რაც გულისხმობს იმას, რომ შემდეგ ეტაპზე სხვა გუნდის გამარჯვებულთან მოუწევს "იუნაიტედს" დაპირისპირება. თუმცა მატას განცხადებით, "წითლებს" არავის არ ეშინიათ და მზად არიან ნებისმიერი გუნდის დასახვედრად.
"უნდა დაველოდოთ და გავიგოთ, ვის წინააღმდეგ მოგვიწევს თამაში. ჩვენ უნდა გვწამდეს, რომ ვინც არ უნდა იყოს, ყველას დამარცხება შეგვიძლია. რა თქმა უნდა, რთული მოწინააღმდეგე გვეყოლება, რადგან ყველა გუნდი, რომელიც შემდეგ ეტაპზე გავიდა ძალიან კარგია."
"თუმცა, არ დაგავიწყდეთ, რომ ჩვენ "მანჩესტერ იუნაიტედი" ვართ. არ აქვს მნიშვნელობა კარგ თამაშებს ვატარებთ თუ ცუდს, ჩვენ ყოველთვის უნდა გვწამდეს და პატივს ვცემდეთ ამ კლუბს და მის ისტორიას და ასევე იმ რწმენას, რაც "იუნაიტედის" გარშემომყოფებს აქვთ ჩვენდამი."
"მესტალაზე" ჩატარებული მატჩი "წითლებისთვის" იმედგამაცრუებელი იყო, რადგანაც "იუნაიტედმა" ვერ გამოიყენა "იუვენტუსის" დაკარგული ქულები და ჯგუფის სათავეში ვერ მოექცა.
"რა თქმა უნდა, მატჩის გეგმა ამ თამაშის მოგება იყო. ჩვენ ყველანაირად ვეცადეთ, რომ შეგვენარჩუნებინა ბურთი. შესაძლოა, საკმარისი არ იყო ჩვენი მცდელობა და ამიტომაც ვერ მოვახერხეთ გამარჯვება. ბევრი კარგი შანსი გავუშვით ხელიდან."
"ძალიან რთული იყო. გულშემატკივართა არმიაც ძალიან მოტივირებული. ვფიქრობ, რამაც ხელი შეგვიშალა იყო ის, რომ გვიან დავიწყეთ აგრესიული თამაში. ჩვენ რამდენიმე მომენტი შევქმენით ბოლოსკენ და მინიმუმ ერთხელ მაინც უნდა გაგვეტანა გოლი."
"რა თქმა უნდა, საბოლოოდ, ყველა იმედგაცრუებულია, რადგან ყველამ ვიცით, რომ "იუვენტუსმა" წააგო და ჩვენი გამარჯვების შემთხვევაში, ჯგუფს სათავეში მყოფები დავამთავრებდით. თუმცა მთავარი ისაა, რომ შემდეგ ეტაპზე გავედით და ახლა მხოლოდ და მხოლოდ "ლივერპულზე" უნდა ვიფიქროთ."
პერეირასთან ერთად აღნიშნული საღამო განსაკუთრებული იყო ხუან მატასთვისაც. შეგახსენებთ, რომ ესპანელმა საკმაოდ დიდი ხანი დაჰყო "ვალენსიაში".
"ჩემი პირადი გადმოსახედიდან, ძალიან კარგი იყო აქ დაბრუნება და ამ კლუბისა და გულშემატკივრების სიყვარულის კიდევ ერთხელ შეგრნება. ძალიან მადლიერი ვარ თითოეული მათგანის მხარდაჭერისთვის."