"მანჩესტერ იუნაიტედის" გულშემატკივრები ჟოზე მოურინიოსგან ტაჰიტ ჩონგისთვის დროის მიცემას ითხოვენ.

"იუნაიტედი" ესპანეთში მიემგზავრება "ჩემპიონთა ლიგის" ჯგუფური ეტაპის ბოლო მატჩის ჩასატარებლად "ვალენსიას" წინააღმდეგ. "წითლებმა" უკვე გაინაღდეს ჯგუფიდან გასვლა, შესაბამისად გუნდი "ლივერპულთან" მატჩის წინ დიდი რესურსის დახარჯვას არ გეგმავს.

გულშემატკივარი მიიჩნევს, რომ ამ მდგომარეობის გათვალისწინებით, მენეჯერმა კლუბის ერთ-ერთ ყველაზე დიდ ტალანტს ტაჰიტ ჩონგს დრო უნდა მისცეს და მისი დებიუტი ძირითად გუნდში "ვალენსიას" წინააღმდეგ უნდა შედგეს.

გამოკითხვა ჩატარდა "M.E.N. Sport"-ის მიერ, სადაც 1506 გულშემატკივრისგან ნახევარმა ჩონგის სასტარტო შემადგენლობაში ყოფნა მოითხოვა. მის თამაშზე უარი მხოლოდ გულშემატკივართა 10%-მა დააფიქსირა. 40% კი მიიჩნევს რომ ჩონგმა სათადარიგოდან უნდა დაიწყოს.

ჰოლანდიელი ვინგერი განაცხადში მხოლოდ ერთხელ "იუვენტუსის" წინააღმდეგ გამართულ მატჩში მოხვდა. თუმცა ჩონგს მოედანზე შესვლის უფლება არ მისცემია. მოურინიომ მაშინ განმარტა, თუ რატომ არ მიეცა ჰოლანდიელს თამაშის უფლება:

"ერთადერთი შემტევი ვინც მყავდა სკამზე ეს 18 წლის ახალგაზრდა ბიჭი იყო, რომელსაც არასდროს უთამაშია პირველ გუნდში. თამაშის დინამიკიდან გამომდინარე კი მივიჩნიე, რომ მისი გამოცდილების ფეხბურთელი იმ მომენტში მოედანზე არ უნდა შემეყვანა."


წყარო: M.E.N.