"იუნაიტედს" დიდი თანხის გადახდა მოუწევს.
კალიდუ კულიბალი "მანჩესტერ იუნაიტედის" პირველი სატრანსფერო სამიზნე იქნება ზამთრის სატრანსფერო ფანჯარაზე და "ოლდ ტრაფორდის" მკვიდრებმა სენეგალის ნაკრების ფეხბურთელის საფასური უკვე გაიგეს.
"წითელი ეშმაკები" ჯერ კიდევ ზაფხულიდან ეძებენ მაღალი კლასის მცველს, მაგრამ მაშინ კლუბის ხელმძღვანელობამ ჟოზე მოურინიოს მოთხოვნილების დაკმაყოფილება არ ისურვა.
თუმცა, ახალი სეზონის ცუდად დაწყებამ და გუნდის დაცვის ცუდმა თამაშმა - პრემიერ ლიგის 16 მატჩში გაშვებული 26 გოლი - ხელმძრვანელობას სინანულის გრძნობა გაუჩინა და გადაწყვეტილების შეცვლას აპირებენ. მოსალოდნელია, რომ იანვარში "იუნაიტედი" ვითარების გამოსწორებას ეცდება.
"იუნაიტედის" წარმომადგენლებმა "ნაპოლის" მცველის ტრანსფერის თაობაზე უკვე გამართეს შეხვედრა იტალიელ კოლეგებთან.
ნეაპოლელების პრეზიდენტმა აურელიო დე ლაურენტისმა ცხადად განაცხადა, რომ კალიდუ გუნდის განუყოფელი ნაწილია და არც ფულის საჭიროებას განიცდის, ამიტომ მხოლოდ დიდი თანხის ოდენობით გაკეთებულ შეთავაზებას განიხილავს.
კულიბალის მისაღებად "ეშმაკებს" მცველში გადახდილი თანხის რეკორდის გაუმჯობესება მოუწევთ - იტალიელები უფრო მეტს მოითხოვენ, ვიდრე "ლივერპულმა" "საუთჰემპტონს" გადაუხადა ვირჯილ ვან დეიკის ტრანსფერში.
ამჟამად დე ლაურენტისს კულიბალიში 90 მლნ. ფუნტზე მეტის აღება სურს, მაგრამ "ნაპოლიმ" შეიძლება დასწიოს თანხა, თუკი 11 დეკემბერს "ლივერპულთან" 2-ბურთიანი სხვაობით დამარცხდება და ჩემპიონთა ლიგის პლეი-ოფში ვერ გავა.
კულიბალის მოქმედი კონტრაქტი 2023 წლამდე აკავშირებს კლუბთან, რაც "ნაპოლის" საგრძნობ უპირატესობას აძლევს მოლაპარაკებების წარმართვისას.
წყარო:
the times