ჩემპიონთა ლიგის მეხუთე ტურის პირველი დღის შეხვედრები დასრულდა. დაძაბული გამოდგა "ოცნებების თეატრში" გამართული მატჩი, "წითელ ეშმაკებს" საშინაო კედლებში შვეიცარიელების დამარცხება გაუჭირდათ. მეტიც, რომ არა "იუნაიტედის" მეკარე დავიდ დე ხეა "წითლები" ამ მატჩიდან ალბათ მინიმუმ ქულის აღებას თუ შეძლებდნენ.

რაც შეეხება გამარჯვების გოლს, მისი ავტორი ჟოზე მოურინიოს ერთ - ერთი საყვარელი ფეხბურთელი, ნახევარმცველი მარუან ფელაინი აღმოჩნდა. ბელგიელმა უჩვეულოდ გაიტანა არა თავით, არამედ მოწინააღმდეგის საჯარიმოში ბურთი დაამუშავა და ფეხით კარგი გასროლაც გამოუვიდა.

მატჩის შემდეგ მარუანმა ჟურნალისტებისთვის მიცემულ ინტერვიუში ჟოზე მოურინიოსა და მას შორის ჩამოყალიბებულ ურთიერთობაზე ისაუბრა და განაცხადა, რომ ჟოზე მას ენდობა, ხოლო მისი ნდობის გამართლებას ის მოედანზე ცდილობს.

"თავს მშვენივრად ვგრძნობ, ბედნიერი ვარ მასთან ერთად მუშაობით. მას ჩემი სჯერა, ეს ფეხბურთელისთვის მნიშვნელოვანია. ვცდილობ ამ ნდობის პასუხი მოედანზე გავცე. გუნდისთვის ყოველთვის დავიხარჯები, არ აქვს მნიშვნელობა შეხვედრას სკამიდან დავიწყებ თუ ძირითადიდან. ყველამ იცის, რომ მე გუნდური მოთამაშე ვარ. მე არცერთ მწვრთნელთან არასდროს პრობლემა არ მქონია." - ციტირებს Sky Sports - ფელაინის სიტყვებს.


წყარო: euro-football