დავიდ დე ხეა მსოფლიოს ყველაზე მაღალანაზღაურებადი მეკარე გახდება. ესპანელის კონტრაქტი ზაფხულში იწურება და მის შეძენას „პსჟ“ ცდილობს. მსოფლიოს ერთ-ერთ საუკეთესო მეკარეს ფრანგები 300 000 ევროს ოდენობით ყოველკვირეულ ანაზღაურებას სთავაზობენ და პოტენციურად მისი ხელფასი შეიძლება წლიურად 60 მილიონ ევროზე მეტიც გახდეს. როგორც პრესაში იწერება, დავიდი „პსჟს“ შემოთავაზებებს ელოდება და სწორედ ამიტომ არ ჩქარობს კონტრაქტის გახანგრძლივებას „იუნაიტედთან“.

„იუნაიტედი“ ისედაც ცუდ დღეშია. „პრემიერ ლიგაში“ მეშვიდე ადგილზე იმყოფებიან და ვერც ოთხეულში მოხვედრის პოტენციალი ჩანს. დავიდ დე ხეას დაკარგვა უდიდესი დანაკარგი იქნება მათთვის.

2011 წელს, როცა ესპანელი „მანჩესტერში“ გადავიდა, საშინელი წნეხის გადატანა უწევდა. მუდმივად ნეგატივს იღებდა როგორც პრესისგან, ასევე გულშემატკივრისგან. დღეს კი ერთ-ერთი საუკეთესო მეკარეა მსოფლიოში.

როგორც პრესაში იწერება, დე ხეას ოცნებას ყოველთვის „რეალ მადრიდში“ თამაში წარმოადგენდა, მაგრამ დედლაინის ამოწურვის გამო 2015 წელს ეს ტრანსფერი ვერ შედგა. რადგანაც „ჩემპიონთა ლიგის“ ჩემპიონებს კურტუა უკვე შეუერთდა, ესპანელმა სხვა გუნდის ძებნა უნდა დაიწყოს.

„იუნაიტედი“ დე ხეასთან მოლაპარაკებებს დიდი ხანია აწარმოებს, მაგრამ უშედეგოდ. მოურინიომ რამდენიმე კვირის წინ აღიარა, რომ არ არის დარწმუნებული შეძლებს თუ არა ესპანელის შენარჩუნებას.

„იუვენტუსმა“ უკვე შეიძინა ახალი მეკარე, „პსჟს“ კი ბუფონის შენარჩუნება მხოლოდ ერთი სეზონით სურდა. ფრანგებს საოცარი შეტევა ჰყავთ, თუმცა დაცვაში უჭირთ და სწორედ ამიტომაც პრესა მიიჩნევს, რომ ესპანელი კიპერისთვის ყველაზე მეტად ისინი იბრძოლებენ.

„იუნაიტედი“ უკვე ეძებს დე ხეას შემცვლელს. „წითლებმა“ თვალი ჯორდან პიქფორდს დაადგეს.


Daily Mail