გარი ნევილი აღიარებს, რომ სერ ალექს ფერგიუსონს ყოველთვის სძულდა 1995-96 წლების გარე ფორმა. "საუთჰემპტონთან" გამართულ მატჩს, ფერგიუსონის გუნდი 3-0-ს აგებდა. ამის შემდეგ სერ ალექსმა ფორმის გამოცვლა მოითხოვა და ფეხბურთელები მეორე ტაიმში სრულიად სხვა ფორმით წარდგნენ გულშემატკივრის წინაშე.
ფერგიუსონმა იგრძნო, რომ ძალიან რთული იყო მისი ფეხბურთელებისთვის ერთმანეთის დანახვა და ნევილიც ადასტურებს რომ ამ ნათქვამს ლოგიკა ჰქონდა.
"მას ეზიზღებოდა ეს ფორმა, მაგრამ არა უმიზეზოდ. სერ ალექსმა მხედველობის სპეციალისტი დაიქირავა, რომელმაც ძალიან ბევრი ტესტი ჩაგვიტარა. უამრავი დაკვირვების შედეგად, სერ ალექსს უთხრა, რომ არსებობს ფერები, რომელთა დანახვაც ბევრ ხალხში უფრო მარტივია. ის ირწმუნებოდა, რომ ნაცრისფერის დანახვა შორ მანძილზე რთული იყო."
"ეს ყველაფერი რამდენიმე თვე გრძელდებოდა. ფერგიუსონი ყველანაირად ცდილობდა ამ ფორმის თავიდან მოშორებას. როცა რომელიმე ჩვენგანი რაიმე შეცდომას დაუშვებდა, სერ ალექსი ყველაფერს ფორმას აბრალებდა. საბოლოოდ, ფერგიუსონმა სეზონის დასრულებამდე რამდენიმე თვით ადრე ამ ფორმის გამოცვლა მოითხოვა და ასეც მოხდა", - დაასრულა ნევილმა.