გარი ნევილი „მანჩესტერ იუნაიტედის“ პირველ გუნდში გადასვლის გამოცდილებას იხსენებს. ინგლისელი ძირითადად პიტერ შმეიხელთან დაკავშირებულ მოგონებებზე საუბრობს:
„ძალიან რთული პერიოდი იყო ჩემთვის. როდესაც პირველ გუნდში ჩავირიცხე, პიტერ შმეიხელის დამოკიდებულება არ მომწონდა. ვამჩნევდი, რომ ძალიან ხშირად იყო ცუდად განწყობილი ჩემ მიმართ. ახლა, რა თქმა უნდა ჩვენ ამ ყველაფერზე ვხუმრობთ, მაგრამ თვითონაც აღიარებს რომ ის ძალიან ცუდად მექცეოდა.“
„მას არ მოვწონდი, როგორც ფეხბურთელი. პიტერი იყო მეკარე და მას ლეგენდარული ოთხეული ედგა წინ: ბრიუსი, პალისტერი, პარკერი, ირვინი... სწორედ იმ დროს როცა პარკერმა ტრამვა მიიღო, მე დავიწყე პირველ გუნდში თამაში. ძალიან პატარა ვიყავი, და ცხადია, რომ იდეალური ვერ ვიქნებოდი. ვუშვებდი შეცდომებს, რაც პიტერს უყურადღებოდ არ რჩებოდა. ვარჯიშებზე ყოველ წამს, ყოველ წუთს, სრული ამ სიტყვის მნიშვნელობით მაწამებდა ხოლმე.“
„გამუდმებით მავარჯიშებდა. თავად დადგებოდა კართან და ბურთს მიგორებდა. ყოველთვის როდესაც ბურთს ვუბრუნებდი, დაიჭერდა ხოლმე და მეუბნებოდა: „კატასტროფაა!“, - იხსენებს ნევილი.
„ეს მუდმივად გრძელდებოდა. მართლა ძალიან საშინლად მექცეოდა და, რა თქმა უნდა, ეს ყველაფერი ჩემზე მოქმედებდა. მაგრამ მე ეს უნდა გამევლო. მანამ სანამ „ოლდ ტრაფორდზე“ დავდგამდი ფეხს და გულშემატკივრებისგან მივიღებდი შეურაცხყოფას და ჩემს სახლიდან გაგდებას დააპირებდნენ, მერჩივნა პიტერის წნეხის ქვეშ გამევლო.“
„ეს მხოლოდ შმეიხელს არ ეხებოდა. პოლ ინსი, როი კინი, ბრაინ რობსონი... შეცდომის დაშვების მეშინოდა. მახსოვს, რა საშინელი პერიოდი გამოვიარე, რა რთული იყო ეს ყველაფერი. მაგრამ როცა ახლა უკან ვიხედები, ვხვდები რომ ძალიან ბედნიერი ვარ, რადგან ეს ყველაფერი გამოვიარე, ნამდვილი ლეგენდებისა და ლიდერების ხელში გამოვიწრთვენი.“
"ეს ყველაფერი რთული იყო, მაგრამ უნდა გამევლო, რადგან სხვანაირად ვერ გადავრჩებოდი, და ვერ შევდგებოდი იმად, ვინც ვარ", - დაასრულა ნევილმა.
ფაქტია, ნევილმა 17 წლის ასაკში ამ ყველაფერს გაუძლო და „92-იანების კლასის“ ნაწილიც გახდა. მან, საბოლოოდ, 8 პრემიერ ლიგის ტიტული, 3 ინგლისის თასი, 2 ლიგის თასი და 2 ჩემპიონთა ლიგის თასი მოიგო. „იუნაიტედის“ მაისურით კი საერთო ჯამში 603 მატჩი ჩაატარა.