"მანჩესტერ იუნაიტედის" მთავარმა მწვრთნელმა ჟოზე მოურინიომ უკმაყოფილება გამოხატა იმის გამო, რომ გუნდის კაპიტანი ანტონიო ვალენსია წინასასეზონო ტურნეზე არასახარბიელო კონდიციებში დაბრუნდა.
არდადეგებიდან ვალენსიას დაბრუნების შემდეგ მოურინიომ ერთ-ერთ პირველ საქმედ 32 წლის ეკვადორელისთვის კაპიტნის სამკლაურის გადაცემა განახორციელა.
თუმცა, როგორც კი პირველ მატჩში მიიღო მონაწილეობა, მეშვიდე წუთზევე მიიღო ტრავმა და შესაძლოა, ამის გამო სეზონის სტარტი გამოტოვოს.
ამის გამო მოურინიომ მიანიშნა, რომ უკმაყოფილოა ვალენსიას საქმისადმი მიდგომით, ვინაიდან იგი საერთოდ არ აქცევდა ყურადღებას თავის ფიზიკურ ფორმას ზაფხულის არდადეგების დროს.
"ანტონიო ვალენსია არდადეგებიდან დაბრუნდა - შესაძლოა დასვენება ძალიან ბევრი მოუვიდა. როცა დაბრუნდა, მისი კონდიციები შორს იყო იდეალურისგან. და თქვენც ნახეთ, რაც მოხდა შემდეგ: მოედანზე გასვლა სცადა, ტრავმა მიიღო და ლაზარეთში გადავიდა", - განაცხადა მოურინიომ.