ჟოზე მოურინიო აღნიშნავს, რომ სეზონს მხოლოდ ინგლისის თასის ფინალის შედეგზე დაფუძნებით არ შეაფასებს.

პრემიერ ლიგაში მეორე ადგილის განაღდების შემდეგ 2017/18 წლების სეზონის ბოლო მატჩში "წითლები" ინგლისის თასის მეცამეტეჯერ აღებას ეცდებიან.

მატჩის წინა პრესკონფერენციაზე მწვრთნელს ჰკითხეს, იქონიებდა თუ არა ფინალური მატჩის შედეგი სეზონზე გავლენას.

"რა თქმა უნდა, ეს განსხვავებას ქმნის, მაგრამ ერთია განსხვავების შექმნა და სულ სხვაა ამის საფუძველზე სეზონის დადებითად ან უარყოფითად შეფასება.

მე ვაანალიზებ ჩემს ღვაწლს, ვაანალიზებ ჩადებულ შრომას, ვაანალიზებ ყველას შრომას, ეს ყველა კი კლუბის უმნიშვნელოვანესი პიროვნებები არიან, რომელთაც ფეხბურთელები განასახიერებენ.

მათ განსჯას ერთ ძალიან მნიშვნელოვან მატჩზე დაფუძნებით არ ვაპირებ. მაგრამ ვიცი, რაც გააკეთეს ფეხბურთელებმა, ვიცი, რაც გავიღე თავად მე, ვიცი ნეგატიური და პოზიტიური მხარეები და არ ვაპირებ ჩემი ანალიზის შედეგების შეცვლას მხოლოდ იმიტომ, რომ ერთი მატჩი ასე დასრულდება. სულაც არა."

"იუნაიტედმა" ოთხშაბათს სამხრეთით იმოგზაურა და სავარჯიშოდ "უოტფორდის" ბაზა გამოიყენა.

მოურინიო აფასებს მანჩესტერელ ფეხბურთელებთან გატარებულ დროს და აცნობიერებს, რომ მალე მათთან მცირე ხნით განშორება მოუწევს.

"ერთმანეთს დაახლოებით ორი თვე ვეღარ ვნახავთ - ხვალინდელი მატჩის შემდეგ ერთმანეთს დავემშვიდობებით. ზოგიერთი არდადეგებს აიღებს, ზოგიერთი კი მსოფლიო ჩემპიონატის სახით საოცნებო მოტივაციას მიიღებს.

მაგრამ ხვალ შუადღეს დავემშვიდობებით ერთმანეთს ივლისის შუა რიცხვებამდე, ზოგიერთს კი აგვისტოს დაწყებამდე. ამიტომ სამი დღის ერთად გატარება ძალიან მნიშვნელოვანი იყო.

როგორც ხედავთ, ამინდიც კარგია და ადგილიც. დიდი მადლობა "უოტფორდს" თავიანთი სავარჯიშო ბაზის გამოყენების უფლების მოცემისთვის.

ყველაფერი რიგზეა და ერთად ყოფნით სიამოვნებას ვიღებთ, ხვალ კი, როგორც უკვე ვთქვი, დამშვიდობების დრო დადგება."

წყარო: manutd.com