ჟოზე მოურინიომ არსენ ვენგერისადმი თავისი პატივისცემა არ დამალა და იმედი გამოთქვა, რომ მისი ვიზავი სეზონის ბოლოს "არსენალიდან" წასვლის შემდეგ ფეხბურთში დარჩება.
ვენგერმა დღეს განაცხადა, რომ თავის 22-წლიან კარიერას ასრულებს და "ტოტენჰემთან" მატჩის წინა პრესკოფერენციაზე მოურინიოს სწორედ ამის შესახებ ჰკითხეს. "ჩემი მოწინააღმდეგეებისთვის ყოველთვის კარგი მსურს. თუკი ბედნიერია მის მიერ მიღებული გადაწყვეტილებით, თუკი ეძებს თავისი ცხოვრების ეტაპზე კარიერის სხვა მწვერვალს, მეც ბედნიერი ვარ. თუ ის დამწუხრებულია, მეც ვწუხვარ.
"არსენალი" მრავალი წლის განმავლობაში იყო სერ ალექსის ეპოქის დიდი მეტოქე, თუ შეიძლება ასე ითქვას. დარწმუნებული ვარ, რომ ჩვენი კლუბი მისტერ ვენგერს საკადრის პატივისცემას გამოუცხადებს.
ვიცი, რასაც ნიშნავს პრემიერ ლიგის სამი ტიტული, შვიდი ინგლისის თასი და არა მარტო ეს; ასევეა ისიც, რაც მან მოუტანა იაპონიას, საფრანგეთს, ფრანგულ ფეხბურთს, "არსენალს" მაშინაც კი, როცა პრემიერ ლიგის მოუგებელი პერიოდი იყო, მთელი ეს გარდასახვა კლუბისა, სტადიონიდან სტადიონამდე, ყველაფერი, რაც მან გააკეთა.
ასე რომ, კვლავაც ვამბობ, თუ ის ბედნიერია გადაწყვეტილებით, მეც ბედნიერი ვარ და იმედი მაქვს, ფეხბურთიდან არ წავა".
მოურინიოს არაერთხელ ჰქონია სიტყვიერი დაპირისპირება ვენგერთან, როცა "ჩელსისა" და "იუნაიტედს" წვრთნიდა და მას ჰკითხეს, წარსულში მომხდარ ინციდენტებს თუ ნანობდა.
"სინანული არაფერ შუაშია. თქვენი შეკითხვა ნათლად ასახავს იმ ადამიანს, ვინც ამ მდგომარეობაში არ ყოფილა. თქვენ არასდროს ყოფილხართ მწვრთნელი, არც ფეხბურთელი და არ იცით, როგორ პატივს ვცემთ ერთმანეთს მაშინაც კი, როცა საპირისპირო ჩანს.
მწვრთნელი ჰგავს იმ ფეხბურთელს, ვინც ყვითელ ან წითელ ბარათს იღებს აგრესიის, ან სხვის წინააღმდეგ გამოვლენილი ქმედებისა თუ ცუდი სიტყვის გამო. საბოლოოდ ისე გამოდის, რომ ერთმანეთს პატივს სცემენ ისინი, ვისაც ერთმანეთთან პრობლემა აქვს.
ეს არის ძალაუფლება ძალაუფლების წინააღმდეგ, ეს არის ხარისხი ხარისხის წინააღმდეგ, ეს არის ამბიცია ამბიციის წინააღმდეგ, მაგრამ საბოლოოდ ეს მაინც ერთი და იმავე საქმის მკეთებელი ხალხია, ურთიერთპატივისმცემი ხალხია, ერთმანეთის კარიერის პატივისმცემელი ხალხია, ასე რომ, სინანული არაფერ შუაშია.
ეს მოხდა - მაგრამ ჩემთვის მნიშვნელობა მხოლოდ იმას აქვს, რომ პატივს ვცემ ადამიანს, პატივს ვცემ პროფესიონალს და მის კარიერას. ყოველთვის ვამბობდი, რომ ზოგიერთს მოკლე მეხსიერება აქვს, მაგრამ ნამდვილი ფეხბურთის კაცებს სულაც არ აქვთ მოკლე მეხსიერება და არც მე მათ შორის."