ჟოზე მოურინიომ არ დამალა "ტოტენჰემთან" მატჩისთვის "მანჩესტერ იუნაიტედის" ფეხბურთელების მზადების პროცესი.

"წითლები" პრემიერ ლიგის გუნდს ინგლისის თასის ნახევარფინალურ ეტაპზე ხვა დაუპირისპირდებიან და 19 მაისს ფინალში მოხვედრას ეცდებიან.

"იუნაიტედს" "მამლებთან" შედარებით ერთით ნაკლები დღე ჰქონდათ მატჩისთვის მოსამზადებლად. "ტოტენჰემი" სამშაბათს ეთამაშა თავის მეტოქეს, მეორე დღეს კი "იუნაიტედმა" "ბორნმუთს" სტუმრად მოუგო, რის შემდეგაც პირდაპირ ლონდონში გაემგზავრა, სადაც "ფულჰემის" სავარჯიშო ბაზაზე ივარჯიშა.

კლუბის ოფიციალური ტელევიზიისთვის მიცემულ ინტერვიუში მოურინიომ მადლობა გადაუხადა "კოტეჯერების" მთავარ მწვრთნელ სლავისა იოკანოვიჩს, რომელმაც საუკეთესო პირობები შეუქმნა "იუნაიტედს" სეზონის ამ ეტაპზე ყველაზე მნიშვნელოვანი მატჩისთვის მოსამზადებლად.

"პირველ ყოვლისა, მადლობა "ფულჰემს", რადგან მათ საუკეთესო პირობები შეგვიქმნეს. გუშინ მათი სტადიონი, "კრეივენ კოტეჯი" გამოვიყენეთ, დღეს კი სავარჯიშო ბაზაზე გასვლის უფლება ვითხოვე და მწვრთნელმა, იოკანოვიჩმა მათი საუკეთესო მოედანი დამითმო, რის გამოც მადლობას ვუხდი "ფულჰემს" და იოკას.

ვფიქრობ, უბრალოდ კარგია, რომ "ბორნმუთთან" მატჩის შემდეგ მანჩესტერში დაბრუნების, ფრენის, სახლში წასვლის, მომდევნო დღეს ისევ გამოსვლისა და ლონდონში დაბრუნების ნაცვლად პირდაპირ ლონდონში წამოვედით. აქ ერთად და მშვიდად ვემზადებით მატჩისთვის", - განაცხადა მწვრთნელმა.

წყარო: manutd.com