"იუვენტუსის" გენერალურმა დირექტორმა ჯუზეპე მაროტამ განაცხადა, რომ "მანჩესტერ იუნაიტედიდან" პოლ პოგბას შეძენის უფლებას ვერ მისცემს თავს.
ფრანგმა ნახევარმცველმა ტურინი 2016 წელს დატოვა და მასთან ერთად "ბებერმა ქალბატონმა" დაკარგა ალვარო მორატაც, რომელიც შეტევის ერთ-ერთ დამრტყმელ ძალას წარმოადგენდა და საბოლოოდ ორივე მათგანი პრემიერ ლიგაში აღმოჩნდა.
ბოლო პერიოდში პოგბა ვერ აჩვენებს სტაბილურ თამაშს და კარგად ჩატარებულ შეხვედრებს უნაცვლებს ცუდ მატჩებს, მისი ყოფილი თანაგუნდელი მორატა კი უფრო რთულ ვითარებაშია "ჩელსის" შემადგენლობაში.
ამ ყველაფრის ფონზე პრესაში გავრცელდა ინფორმაცია, რომ იტალიის ჩემპიონები ფრანგისა და ესპანელის დაბრუნებას აპირებენ, მაგრამ კლუბის დირექტორი აცხადებს, რომ მას ამის არ სჯერა.
"შეიძლება თუ არა პოგბასა და მორატას დაბრუნება? არ მჯერა, რომ ცხენის ორჯერ გახედნა შეიძლება, მაგრამ გამონაკლისებიც არსებობს.
ორივე დიდი პროფესიონალია, რომლებმაც ჩვენთან წარუშლელი კვალი დატოვეს, მაგრამ საკუთარ თავს ვერ მივცემთ იმდენის გადახდის უფლებას, რა ფასიც ახლა მათ ადევთ.
გონსალო იგუაინის ტრანსფერი წარმოუდგენელი რამ იყო, მაგრამ ეს შესაძლებელი გახდა მხოლოდ იმიტომ, რომ პოგბა გავყიდეთ", - განაცხადა მაროტამ.