ლეგენდარული ჰოლანდიელი ნახევარმცველი არიენ რობენი, საინტერესო ისტორიას იხსენებს და საუბრობს იმაზე თუ რატომ არ გადავიდა 2004 წელს "მანჩესტერ იუნაიტედის" შემადგენლობაში.
იმ დროს ბრიტანული ტაბლოიდები აქტიურად წერდნენ, რომ ჰოლანდიელი სუპერვარსკვლავი სულ მალე გადავიდოდა "ოლდ ტრაფორდზე" და "იუნაიტედს" შეუერთდებოდა, თუმცა ყველასგან გასაკვირად ფეხბურთელმა "მანჩესტერს" ლონდონის "ჩელსი" არჩია და არისტოკრატების ღირსების დამცველი გახდა.
"ძალიან სასიამოვნო საუბარი მქონდა სერ ალექს ფერგიუსონთან "მანჩესტერში" ვახშმობის დროს. ჩვენ ვისაუბრეთ ფეხბურთზე, ვისაუბრეთ ცხოვრებისეულ თემებზე, "იუნაიტედის" სავარჯიშო ბაზაც მოვინახულე და მანდ ყველაფერი ბრწყინვალე იყო. ვფიქრობდი ჩემით, რომ თუ ამ შეხვედრაზე "მანჩესტერ იუნაიტედი" კონტრაქტს შემომთავაზებდა, მე მას ხელს აუცილებლად დაუფიქრებლად მოვაწერდი.
მას შემდეგ რაც "პსვ" - ში დავბრუნდი არაფერი არ მომხდარა. არ იყო არანაირი კონტაქტი და შემოთავაზება. ამ დროს "პსვ"- ს ხელმძღვანელობა მოლაპარაკებებს ლონდონის "ჩელსისთან" მართავდა. მე მათ წარმომადგენლებს პირადად ვესაუბრე და მათი გეგმა მომეწონა. შეთანხმების მისაღწევად საჭირო გახდა მხოლოდ ერთი შეხვედრა - ყველაფერი სწრაფად მოხდა. განვმეორდები, რომ თუ "იუნაიტედის" მხრიდან შემოთავაზება მექნებოდა მე მას აუცილებლად დავთანხმდებოდი თუმცა მსგავსი არაფერი ყოფილა, რის გამოც არ ვწუხვარ".- განაცხადა რობენმა ჟურნალ FourFourTwo - სთვის მიცემულ ინტერვიუში.