"მანჩესტერ იუნაიტედის" მთავარი მწვრთნელი ჟოზე მოურინიო აცხადებს, რომ ჩემპიონთა ლიგის მეოთხედფინალში გასვლა მისი გუნდისთვის კარგი მიღწევა იქნებოდა, მაგრამ ამისთვის მერვედფინალური დაპირისპირება უნდა მოიგოს.
"წითლები" ჩემპიონთა ლიგის 16 საუკეთესო გუნდს შორის არიან და მომდევნო ეტაპზე გასასვლელად "ოლდ ტრაფორდზე" "სევილიას" დამარცხება სჭირდებათ.
ორმატჩიანი დუელის პირველი შეხვედრა ფრედ 0:0 დასრულდა, რაც მომდევნო ეტაპზე გამსვლელის ვინაობას ღიად ტოვებს და მიუხედავად იმისა, რომ მოურინიო აღიარებს, მის გუნდს არავითარი უპირატესობა არ აქვს, მიაჩნია, რომ მეოთხედფინალში გასვლა "სევილიას" პრობლემის გადაჭრით სრულიად შესაძლებელია.
"ვფიქრობ, ევროპა ლიგის ფინალი ბოლო წლებში საერთაშორისო დონეზე ჩვენი ყველაზე მნიშვნელოვანი მატჩი იყო, რადგან ჩვენ მოვიგეთ ტურნირი და ამ მოგებამ "მანჩესტერ იუნაიტედი" მისთვის კუთვნილ ადგილას დააბრუნა, რასაც ჩემპიონთა ლიგა ჰქვია.
"მანჩესტერ იუნაიტედი" ჩემპიონთა ლიგის გუნდია, ამიტომ გასულ სეზონში გამარჯვება ძალიან მნიშვნელოვანი იყო, რადგან პრემიერ ლიგის ოთხეულს მიღმა დავრჩით და ევროპა ლიგის მოგებით ჩვენ ტიტულიც მოვიპოვეთ და ამავდროულად ჩემპიონთა ლიგაზეც დავბრუნდით.
თუკი ამ დაპირისპირებას მოვიგებთ და რვა საუკეთესო გუნდს შორის მოვხვდებით, ეს კარგი მიღწევა იქნება. მაგრამ მიმაჩნია, რომ მეოთხედფინალშიც რომ გავიდეთ, ცხოვრება გრძელდება და ეს ნიშნავს, რომ წინ პოტენციური ნახევარფინალია - არ ვაპირებთ მეოთხედფინალში ისე გასვლას, თითქოს შანსი არ გვქონდეს. სულაც არა. მაგრამ ამჟამად უდიდესი პრობლემა გვაქვს გადასაჭრელი და ამ პრობლემის სახელი "სევილიაა".