"მანჩესტერ იუნაიტედის" კაპიტანმა მაიკლ კერიკმა დაადასტურა, რომ სეზონის ბოლოს კარიერას დაასრულებს.
ჟოზე მოურინიომ ადრე შენიშნა, რომ 36 წლის ფეხბურთელი ბუცების ჩამოკიდებას აპირებდა, რითაც ზღაპრული კარიერის დასასრულს ამცნობდა საზოგადოებას, კერიკმა კი დღეს ეს გადაწყვეტილება საბოლოოდ ცხადყო.
მაიკლს სამწვრთნელო შტაბში სთავაზობენ ადგილს, მაგრამ ამჯერად იგი მხოლოდ იმას ამბობს, რომ შესაძლო გამოსავალი ეს არის.
"თქვენთან გულახდილი რომ ვიყო, უკვე ბევრი რამ ითქვა ისედაც", უპასუხა, როცა კარიერის დასრულების შესახებ ჰკითხეს. "დგება დრო, როცა მოგწონს თუ არ მოგწონს, სხეული გეუბნება, რომ ფეხბურთის თამაში უნდა შეწყვიტო. მე სწორედ ამ ეტაპზე ვარ, რაც კარგია. ამას უნდა შეეგუო. მეც სწორედ ასე ვიქცევი".
როცა შეკითხვა ჟოზეს შტაბში შესვლაზე დაუსვეს, მან უპასუხა: "კი. ამის გამორიცხვა არ შეიძლება. ჯერ კიდევ ვმართავთ მოლაპარაკებებს, ასე რომ, ჯერ არაფერია დადასტურებული. მაგრამ შესაძლებელი ნამდვილად არის".
სახელოვანი ნახევარმცველი "იუნაიტედს" 2006 წელს შეუერთდა და შარშან მის საპატივცემულოდ მატჩიც გაიმართა გაწეული სამსახურის დასაფასებლად. მას ჯერ კიდევ აქვს იმედი, რომ გუნდს სარგებელს მოუტანს დარჩენილ დროში გულის პრობლემების მოგვარების შემდეგ.
"ტკივილი ჯერ კიდევ "ბარტონთან" მატჩის მეორე ტაიმში ვიგრძენი და ამის შემდეგ რამდენიმე ტესტი ჩავიტარე. იგივე ტკივილი ვიგრძენი იმავე კვირის კვირა დღეს ვარჯიშზე, მომდევნო კვირას კი პროცედურა ჩავიტარე, რასაც ბოლომდე მივყევი და ახლა სრულიად ჯანმრთელი ვარ. გონზე მოსასვლელად ცოტა დრო დამჭირდა, მაგრამ იყო პერიოდი, ორი თუ სამი დღე, როცა საკუთარ თავს ვეკითხებოდი, შემიძლია ისევ თამაში თუ არა? ღირს კი ამის კეთება თუ არა? მაგრამ ამან ჩაიარა.
უკან ჯანმრთელი დავბრუნდი და ჩემებურად დასრულება მინდოდა. სხვა თუ არაფერი, გადაწყვეტილების მიღება ჩემზე იყო და არავინ არაფერს მაიძულებდა, მე კი მონდომებული დავბრუნდი. დაბრუნების შემდეგ ვხვდებოდი, რომ ისე ხშირად ვეღარ ვითამაშებდი, როგორც ეს პრობლემის არქონის შემთხვევაში იქნებოდა, მაგრამ ამას მივეჩვიე. თავდაუზოგავად ვვარჯიშობდი და ასევე ვაგრძელებდი, შემდეგ კი რამდენიმე მატჩში მივიღე მონაწილეობა და ვნახოთ, რა მოხდება სეზონის დასრულებამდე".