"მანჩესტერ იუნაიტედის" მთავარი მწვრთნელი ჟოზე მოურინიო მიიჩნევს, რომ "ლივერპულთან" მოპოვებული სასიამოვნო გამარჯვება არავის გაახსენდება, თუკი მისი გუნდი იმავე შედეგს ვერ მიაღწევს უახლოეს ორ მატჩში.
გამოცდილი მწვრთნელი სრულად აცნობიერებს თანამედროვე საფეხბურთო დამოკიდებულებას და კიდევ ერთხელ უსვამს ხაზს პლეი-ოფის სტადიის მატჩების მნიშვნელობას - დაწყებული UEFA-ს ჩემპიონთა ლიგაზე "სევილიასთან" დაპირისპირებით.
ესპანეთში უგოლოდ დასრულებული მატჩის შემდეგ "წითლები" ყოველმხრივ ეცდებიან გოლის გაშვების თავიდან არიდებას და საჭიროებენ ისეთივე ხმაურიან "ოლდ ტრაფორდს", როგორიც ეს მერსეისაიდელებთან დახვედრისას იყო.
მერვედფინალური მატჩის შემდეგ "იუნაიტედს" ინგლისის თასის ეგიდით "ოლდ ტრაფორდზე" "ბრაიტონ ენ ჰოუვ ალბიონის" მიღება მოუწევს. გამარჯვებულის ბედი იმავე საღამოს გადაწყდება და ის გუნდი ნახევარფინალს "უემბლიზე" ჩაატარებს.
და ვინაიდან სეზონის დასკვნით ნაწილში შევდივართ, ნებისმიერმა ფეხის დაცდენამ შეიძლება მოგვისპოს ტიტულზე ოცნება, ამას კი მოურინიო შესანიშნავად ხვდება.
"ვფიქრობ, თანამედროვე ფეხბურთში დღიდან დღემდე, კვირიდან კვირამდე, მატჩიდან მატჩამდე ვცხოვრობთ. ჩვენი მატჩი სამშაბათსაა და წარმომიდგენია, როგორ დაივიწყებს ყველა ჩვენს შედეგებს ბოლო კვირებში, თუკი "სევილიასთან" დავმარცხდებით.
ასეთია თანამედროვე ფეხბურთში. ჩვენ უნდა ვიცხოვროთ შექმნილ გარემოში და გავუმკლავდეთ მას. დიახ, ჩვენ დავამარცხეთ "ჩელსი", "არსენალი", "ტოტენჰემი" და "ლივერპული". ექვსეულიდან ამჟამად მხოლოდ "მანჩესტერ სიტისთან" არ გვაქვს მოგება. ეს კი არაფერს ნიშნავს თანამედროვე ფეხბურთში, საკუთარი შესაძლებლობები ყოველდღე უნდა დავამტკიცოთ.
"სევილია" და "ბრაიტონი" ახლა უფრო მნიშვნელოვანია, ვიდრე "ლივერპული". "ლივერპულთან" დიდი მატჩი იყო, პირდაპირ კონკურენტთან მატჩი ოთხეულში მოხვედრაზე, მაგრამ არაფერი გადაწყვეტილა. წინ კიდევ რვა შეხვედრა და 24 ქულაა გასათამაშებელი. "სევილია" კი სიკვდილ-სიცოცხლის საკითხია. "ბრაიტონი" სიკვდილ-სიცოცხლის საკითხია. ეს ორი მატჩი უფრო მნიშვნელოვანია, ვიდრე "ლივერპული" იყო".