ჟოზე მოურინიომ დაადასტურა, რომ ენტონი მარსიალი UEFA-ს ჩემპიონთა ლიგის მერვედფინალური ეტაპის საპასუხო მატჩში "სევილიას" წინააღმდეგ თამაშს შეძლებს, ხოლო პოლ პოგბას მდგომარეობა ჯერ კიდევ საკითხავია.
პოგბამ "ლივერპულთან" მატჩი პარასკევს ვარჯიშზე მიღებული მიკროტრავმის გამო გამოტოვა. ის არც დღეს დილას გამართულ სესიაზე იმყოფებოდა, მაგრამ როცა მოურინიოს ჰკითხეს, მან დაადასტურა, რომ ფრანგი სესიას უკვე მედიისთვის დახურული ვარჯიშების დროს შეუერთდა.
"მან თქვენი წასვლის შემდეგ ივარჯიშა. არ ვიცი, შეძლებს თუ არა თამაშს. ჯერ არ ვიცით, მაგრამ თქვენი წასვლის შემდეგ ცოტა ივარჯიშა", - განაცხადა მწვრთნელმა.
"იუნაიტედის" მცველები ფილ ჯონსი, მარკოს როხო და დეილი ბლინდი მატჩს გამოტოვებენ. ასევე იქნება ხელმიუწვდომელი ნახევარმცველი ანდერ ერერა.
საკითხავია, როგორ იგრძნობს თავს ზლატან იბრაჰიმოვიჩი და შეძლებს თუ არა თამაშს.