"მანჩესტერ იუნაიტედის" მთავარი მწვრთნელი აცხადებს, რომ "ოლდ ტრაფორდზე" გასამართი მომდევნო სამი მატჩი მისთვის ერთნაირად მნიშვნელოვანია.
"წითლები" ერთი კვირის ინტერვალში სამჯერ მიიღებენ საშინაო არენაზე მეტოქეს და სამივე შეხვედრას სხვადასხვა ტურნირზე გამართავენ.
10 მარტს "იუნაიტედს" "ლივერპული" ეწვევა პრემიერ ლიგის ეგიდით გასამართ მატჩში, სამ დღეში კი ჩემპიონთა ლიგის მერვედფინალური ეტაპის საპასუხო მატჩში მოურინიოს გუნდი "სევილიას" მიიღებს, რის შემდეგაც 17 მარტს ინგლისის თასის ნახევარფინალის საგზურის მოპოვებას ეცდება "ბრაიტონის" წინააღმდეგ მატჩში.
პორტუგალიელი მწვრთნელი არ აპირებს რომელიმე მატჩისთვის უფრო მეტად დაზოგოს ძალები და აცხადებს, რომ სამივე შეხვედრა მისთვის ერთნაირად მნიშვნელოვანია.
"არ ვიცი, რომელია უფრო მნიშვნელოვანი. გულახდილად ვამბობ, არ ვიცი. წინ სამი მატჩი გვაქვს: "ლივერპული", "სევილია" და "ბრაიტონი". თუ არჩევანის გაკეთებას მთხოვთ, რომელია ყველაზე მნიშვნელოვანი, ვერ ავირჩევ.
ჩემთვის ყველაზე მნიშვნელოვანი "ლივერპულთან" შეხვედრაა, რადგან ის არის მომდევნო. მაგრამ შემდეგი ორი მატჩი პლეი-ოფია და შემდეგი ორი მატჩი ნიშნავს, რომ ჩვენ ჩემპიონთა ლიგის მეოთხედფინალში გავალთ ან ვერ გავალთ, "უემბლიზე" ნახევარფინალს ვითამაშებთ, ან ვერ ვითამაშებთ.
"ლივერპულთან" გამარჯვება მსურს, რა თქმა უნდა, მსურს. ეს დიდი მატჩია, დიდი მეტოქე. ეს არის გუნდი, რომელიც პრემიერ ლიგაში ჩვენს უკან იმყოფება. ეს არის გუნდი, რომელიც ჩემპიონთა ლიგის მეოთხედფინალში გავიდა, ასე რმ, დიდი მატჩია. მაგრამ ასეთი სახის მტრობაში კარგი არ ვარ, ჩემთვის ყველა მეტოქე მტერია."