ჟოზე მოურინიომ "მანჩესტერ იუნაიტედის" ტრავმირებულ ნახევარმცველ მარუან ფელაინის შესახებ ისაუბრა.
ბელგიელმა ფეხბურთელმა უკანასკნელი მატჩი 31 იანვარს "ტოტენჰემის" წინააღმდეგ "უემბლიზე" პრემიერ ლიგის ეგიდით ჩაატარა და იმავე შეხვედრაში მიიღო ტრავმა.
"კრისტალ პალასთან" მატჩის წინ გამართულ პრესკონფერენციაზე პორტუგალიელმა ფელაინის შესახებ განცხადება გააკეთა: "ჯერ კიდევ ახალგაზრდაა, მას პატარა ოპერაცია გაუკეთეს, მაგრამ მხოლოდ პატარა და რამდენიმე კვირაში კვლავ შეძლებს მოედანზე გასვლას. თუკი ჩემპიონთა ლიგაზე "სევილიას" გავცდებით, ჰიპოტეთიკური მეოთხედფინალისთვის მზად იქნება. ასევე მზად იქნება ჰიპოტეთიკური ინგლისის თასის ნახევარფინალისთვის. პრემიერ ლიგაში ჩვენი ბრძოლის ბოლო რამდენიმე თვეში დაგვეხმარება".
რაც შეეხება ფელაინის კონტრაქტს და იმას, თუ რა ხდება ამასთან დაკავშირებით, ჟოზემ განაგრძო: "აპირებს დარჩეს თუ წავიდეს? არ ვიცი. არ ვიცი. მინდა, რომ დარჩეს, კლუბსაც სურს მისი დარჩენა. პროცესი, მოლაპარაკებები, ციფრები, მანძილი შეთავაზებასა და მის სურვილს შორის - მართლა არ ვიცი, რა ხდება".
ცალკე კლუბის ოფიციალურ ტელევიზიასთან ინტერვიუში მან ტრავმირებულთა შესახებაც ისაუბრა:
"არც ფილ ჯონსი, არც მარკოს როხო, არც დეილი ბლინდი. არცერთი არ გვყავს. ასე რომ, სიტუაცია არ შეცვლილა. იგივე შემადგენლობაა".
დიდი ბრიტანეთი ამ კვირაში ცივმა ამინდმა მოიცვა და მანჩესტერიცა და მთელი ინგლისიც თოვლმა დაფარა. მოურინიომ განაცხადა, რომ ამან მისი გუნდის ვარჯიშზე გავლენა მოახდინა.
"გუშინ დახურულ შენობაში ვიმუშავეთ, დღეს კი ღია ცის ქვეშ, მაგრამ რთული იყო. ვეცადეთ, ვიმუშავეთ. გუნდში პოზიტიური განწყობაა და ვერ დავიჩივლებთ, რადგან მორჩა. ასე რომ, დღის დანარჩენ ნაწილში ფეხბურთელები სახლში იქნებიან."