"ჩელსისა" და "მანჩესტერ იუნაიტედის" დაპირისპირების წინ ორივე გუნდის მწვრთნელმა განაცხადა, რომ ერთმანეთის შესახებ გაკეთებული მწარე განცხადებების დასრულება სურთ.
ორივე მწვრთნელი ერთმანეთს კვირას დაუპირისპირდება და მათი ყურადღება მხოლოდ ამ მატჩზე იქნება გადატანილი.
კონტე და მოურინიო მანამდეც დაპირისპირებიან ერთმანეთს და პროვოკაციული სიტყვებით გამოუთქვამთ აზრი, მაგრამ ამჯერად ორივე მწვრთნელი თანხმდება, რომ ურთიერთობის დალაგების დრო მოვიდა.
მატჩის წინ კონტემ განაცხადა: "ამ საკითხით დაინტერესებული არ ვარ. წარსულში ორივემ ვთქვით რაღაც, მაგრამ ახლა უნდა შევჩერდეთ. ჩემთვის ეს ამბავი დასრულებულია".
კონტეს მსგავსად მოურინიოც მზად არის, თავისი ყურადღება ფეხბურთისკენ მიმართოს და პირადი უთანხმოება გვერდზე გადადოს.
"მანამდეც გითხარით, რომ ამაზე ლაპარაკს არ ვაპირებდი. სულაც არა. ეს არ არის მთავარი თემა. კარგი მწვრთნელია, ფანტასტიკური გუნდი ჰყავს და სწორედ ეს არის ჩემთვის მნიშვნელოვანი. მხოლოდ ეს."