ანდერ ერერას დაბრუნება "მანჩესტერ იუნაიტედის" სასტარტო შემადგენლობაში ხანმოკლე გამოდგა, ვინაიდან ბასკმა ფეხბურთელმა "სევილიასთან" მატჩის მე-15 წუთზე ტრავმა მიიღო.
ერერამ ბოლო სამი კვირის განმავლობაში პირველი მატჩი ჩაატარა, მაგრამ იძულებული გახდა, მოედანი დროზე ადრე დაეტოვებინა. მოწინააღმდეგის საჯარიმოში ქუსლში მიღებული დარტყმის შემდეგ ანდერმა მაშინვე გაიხადა ბუცი და მწვრთნელს აჩვენა, რომ თამაშის გაგრძელება არ შეეძლო.
ერერა იანვრის დასრულების შემდეგ ვერ ახერხებდა თამაშს და მან გამოტოვა პრემიერ ლიგის ორი, ინგლისის თასზე კი ერთი შეხვედრა.
მისი ადგილი "რამონ სანჩეს პისხუანზე" გამართულ მატჩში პოლ პოგბამ დაიკავა და თავის გუნდს ფრის მოპოვებაში დაეხმარა.
მატჩის შემდეგ მოურინიომ ერერას ტრავმის შესახებ ისაუბრა: "ვფიქრობ, ცუდი ტრავმაა. შაბათს სამედიცინო შტაბმა მის მდგომარეობას სრულიად ჯანსაღი უწოდა. შაბათს, კვირას და ორშაბათს ჩვენთან ერთად ივარჯიშა და კარგად გრძნობდა თავს.
მოედანზე ყოფნის დროს როგორ ინტენსიურობასაც ის აჩვენებდა, მხოლოდ კარგ ფორმაში მყოფ ფეხბურთელს შეეძლო ამის გაკეთება.
შემდეგ კი ტრავმა მიიღო ქუსლის არეში, რამაც ტკივილი გადაიტანა კუნთში, სადაც მანამდე პრობლემა ჰქონდა".