მაიკლ კერიკს მიაჩნია, რომ "მანჩესტერ იუნაიტედი" იქ არის, სადაც მისი ადგილია - UEFA-ს ჩემპიონთა ლიგის პლეი-ოფში.

"წითლები" ოთხშაბათს საღამოს "რამონ სანჩეს პისხუანზე" "სევილიას" ეწვევიან და 2013/14 წლების სეზონის შემდეგ პირველ ჩაატარებენ მერვედფინალურ მატჩს.

კლუბის ოფიციალურ ტელევიზიასთან საუბრისას კაპიტანმა განაცხადა, რომ ევროპული ტურნირის ამ ეტაპზე მისი გუნდის გამოსვლა გასაკვირი არ უნდა იყოს.

"საკუთარი თავისგან სწორედ ამას უნდა ველოდეთ - ჩემპიონთა ლიგის ამ ეტაპზე ყოფნას. არ ვაჭარბებ, უბრალოდ ეს ჩვენი სტანდარტია. ამ ტურნირზე წლების განმავლობაში უნდა ვიასპარეზოთ და გვიანდელ ეტაპებზე გავიდეთ.

ჩვენი ადგილი სწორედ აქ არის, და თუმცა რამდენიმე წელია არ გვითამაშია, ყოველწლიურად სტანდარტად უნდა დავისახოთ", - განაცხადა კერიკმა.

"ოლდ ტრაფორდზე" გატარებული 12 წლის განმავლობაში კერიკი მერვედ იასპარეზებს ჩემპიონთა ლიგის პლეი-ოფში. კაპიტანი იმ გუნდის წევრიც იყო, რომელმაც 2008 წელს ტურნირი მოიგო, მომდევნო წელს და 2011-ში კი ფინალისტი გახდა.

"რამდენიმე წლის წინ ეს გარდაუვალი იყო. ყოველ სეზონში გვქოდა დიდი შეხვედრა და მათში მართლაც კარგად ვთამაშობდით, რამაც ყველაფერი ჩვეულებრივი გახადა. სწორედ ამ გზას უნდა დავუბრუნდეთ და ასეთი შეხვედრები ჩვევად ვაქციოთ".

მიმდინარე სეზონი კერიკისთვის უკანასკნელი იქნება ფეხბურთელის რანგში და ჩვენი 16 ნომერი აღნიშნავს, რომ სეზონის ბოლომდე ნებისმიერი მომენტით ისიამოვნებს.

"ჩემთვის ბოლო რამდენიმე თვე იქნება და ეს თავისთავად ქმნის განსხვავებულ შეგრძნებას. კარიერის მიწურულს ჩემპიონატში, თასსა და მითუმეტეს ჩემპიონთა ლიგაზე, მატჩები გარანტირებული არასდროს გაქვს".

წყარო: manutd.com