"მანჩესტერ იუნაიტედის" ნახევარმცველი ნემანია მატიჩი მიიჩნევს, რომ შაბათს "ჰადერსფილდთან" მოგებული შეხვედრა ძალიან მნიშვნელოვანი იყო გუნდის თავდაჯერებულობის ზრდაში "სევილიასთან" რთული მატჩის წინ.

რომელუ ლუკაკუს დუბლის წყალობით "წითლებმა" ინგლისის თასის მეოთხედფინალში გასვლა გაინაღდგა, მაგრამ მატჩის მთავარ მოვლენად მაინც ვიდეო რეფერი იქცა, რომელმაც ხუან მატას მიერ გატანილი გოლი გააუქმა.

მიუხედავად ამისა, "იუნაიტედმა" სასურველ შედეგს მაინც მიაღწია და მატიჩს მიაჩნია, რომ ეს ძალიან მნიშვნელოვანი მოვლენაა გუნდის რთული შეხვედრის წინ.

"ჩვენი თავდაჯერებულობისთვის ძალიან მნიშვნელოვანია ეს გამარჯვება. წინ ჩემპიონთა ლიგის მატჩია რთული მეტოქის წინააღმდეგ. ახლა უნდა დავისვენოთ, რადგან ძალიან რთული მატჩი გვქონდა და თუ შუა კვირაში გამარჯვება გვსურს, მაქსიმუმი უნდა გავიღოთ და კარგად ვითამაშოთ".

ლუკაკუმ თავისი 21-ე გოლი გაიტანა მიმდინარე სეზონში და მატიჩს მიაჩნია, რომ ბელგიელისთვის ეს ძალიან მნიშვნელოვანია წინამდებარე რთული მატჩების ფონზე.

"ის ჩვენი მთავარი ფორვარდია და ძალიან მნიშვნელოვანია მისი თავდაჯერებულობისთვის, რომ გოლები გააქვს. დიდებული ფორვარდია და ძალიან ახალგაზრდა, დარწმუნებული ვარ, სეზონის ბოლომდე ჩვენთვის მნიშვნელოვან როლს ითამაშებს.

მიხარია, რომ ჩვენს გუნდშია და ორი გაიტანა, რაც ზუსტად ის არის, რაც თავდამსხმელმა უნდა აკეთოს."

კარგი შემტევი სტილის გარდა, გუნდმა მიმდინარე სეზონში 22-ე "მშრალი" მატჩი ჩაატარა და მატიჩმა ამაში უშუალო მონაწილეობა მიიღო.

"მიხარია, რადგან აქ სწორედ ამისთვის ვარ. პრემიერ ლიგის გუნდების წინააღმდეგ ძალიან რთულია კარის "მშრალად" შენახვა, რადგან ყველას აქვს გოლის გატანის შანსი. ზოგიერთი სტანდარტული მდგომარეობის დროს 100%-ით ყურადღებიანი უნდა იყო და ბედნიერი ვარ, რომ "მშრალი" მატჩი ჩავატარეთ."

წყარო: manutd.com