მადრიდის "რეალთან" დაკავშირებული ჭორების ფონზე დავიდ დე ხეა აცხადებს, რომ "მანჩესტერ იუნაიტედში" ბედნიერია.

ესპანელ მეკარეს დიდი ხანია უწინასწარმეტყველებენ მადრიდულ გრანდში გადასვლას, 2015 წელს კი მას მხოლოდ რამდენიმე წუთი დააკლდა ტრანსფერამდე.

"ოლდ ტრაფორდზე" გატარებული შვიდი სეზონის შემდეგ კი აღიარებს, რომ ერთ-ერთი ყველაზე მნიშვნელოვანი ფეხბურთელია გუნდში.

"დრო ძალიან სწრაფად გადის. აქ შვიდი წელი გავატარე და ბედნიერი ვარ. ბევრი რამ გადამხდა თავს - კარგიც და არც ისე კარგი, - მაგრამ გულახდილად ვამბობ, რომ აქ ბედნიერი ვარ.

გასახდელ ოთახში თავი მნიშვნელოვანი ფეხბურთელი მგონია. აქ ერთ-ერთი ყველაზე ძველი მოთამაშე ვარ. მაბედნიერებს ახალგაზრდების გამოჩენა. ისინი ცდილობენ, "იუნაიტედი" დიდ გუნდად აქციონ", - განაცხადა დავიდმა.

"რეალი" ლა ლიგაში წარუმატებელი სეზონის შემდეგ ზაფხულის სატრანსფერო ფანჯარაზე დიდი ფულის დახარჯვას გეგმავს და კეილორ ნავასის შეცვლის კანდიდატებად დე ხეაცა და "ჩელსის" მეკარე ტიბო კურტუაც მოიაზრებიან.

მის მომავალთან დაკავშირებით როცა ჰკითხეს, ესპანელმა უპასუხა: "არა მგონია, კარგი აზრი იყოს მომავლის განხილვა. მხოლოდ აწმყო, კარგად თამაში, თავის კარგად გრძნობა და "იუნაიტედის" დახმარებაა მნიშვნელოვანი".

წყარო: M.E.N.