"მანჩესტერ იუნაიტედის" მთავარი მწვრთნელი ჟოზე მოურინიო მიიჩნევს, რომ ჩემპიონთა ლიგის მერვდედფინალში მისი გუნდი ტურნირის მოგების კანდიდატად არ ითვლება.

"წითელ ეშმაკებს" ჩემპიონთა ლიგის მერვედფინალურ ეტაპზე დევიდ მოიესის მთავარი მწვრთნელობის შემდეგ არ უთამაშიათ, ოთხშაბათს კი გუნდი "სევილიას" ეწვევა "რამონ სანჩეს პისხუანზე" და 1/8 ფინალური ეტაპის პირველ მატჩს გამართავს ჟოზე მოურინიოს ხელმძღვანელობით.

ჩემპიონთა ლიგის მიმდინარე გათამაშებაში "იუნაიტედი" გასულ სეზონში ევროპა ლიგის მოგების შედეგად მოხვდა და ჯგუფში პირველი ადგილი დაიკავა.

ჟოზე მიიჩნევს, რომ მერვედფინალში მისი გუნდი ტურნირის მოგების კანდიდატად არ უნდა ჩაითვალოს, ვინაიდან ამ ეტაპზე დიდი ხანია არ უთამაშია, მაგრამ თუ მეოთხედფინალში გავა, შემდეგ უკვე გაუჩნდება რეალური შანსი.

"როცა მერვედფინალში ხარ, საერთო გამარჯვებულზე ლაპარაკი არც კი ღირს. ამ სტატუსით ის გუნდები სარგებლობენ, რომლებიც წლიდან წლამდე აღწევენ ტურნირის გვიანდელ სტადიებამდე.

ამჟამად ჩვენ მხოლოდ ერთ-ერთი გუნდი ვართ იმათ შორის, რომლებიც მერვედფინალში თამაშობენ. საფუძვლიანი მიზეზი მაშინ გვექნება, თუკი მეოთხედფინალში გავალთ: ამ ეტაპზე უკვე შეიძლება გამარჯვების კანდიდატებად ჩავითვალოთ.

როცა ტურნირზე რვა გუნდი რჩება, კენჭისყრას საინტერესო სცენარის განვითარება და ნახევარფინალამდე თუ ფინალამდე გზის გაკვალვა შეუძლია. მაგრამ ახლა ძალიან ადრეა ამაზე ლაპარაკი", - განაცხადა მოურინიომ.