"მანჩესტერ იუნაიტედის" კაპიტანი მაიკლ კერიკი მიიჩნევს, რომ კარიერის დასრულების შემდეგ მის ადგილს გუნდში ახალგაზრდა სკოტ მაკტომინეი დაიკავებს და 36 წლის ფეხბურთელი ამაში დაეხმარება.

რა თქმა უნდა, ტიტულებით სავსე კერიკის კარიერა ჯერ კიდევ გრძელდება და მის თაროებს კიდევ შეიძლება დაემატოს რამდენიმე მედალი, ვინაიდან "იუნაიტედი" სამ ტურნირზე ასპარეზობს. მაგრამ ბოლო დროს მაიკლი გულის პრობლემებმა შეაწუხა და მოედანზე დაბრუნებულს მხოლოდ ისღა სურს, კარიერის უკანასკნელი თვეების განმავლობაში "წითლებს" დახმარება გაუწიოს.

გუნდს კი სჭირდება ადვილად მორგებადი ფეხბურთელი ნახევარდაცვის ხაზში, რის იმედსაც იძლევა მაკტომინეი. 21 წლის სკოტმა ჟოზე მოურინიოსგან მიცემული შანსი სათანადოდ გამოიყენა და წარმატებულად იასპარეზა.

"სკოტი შესანიშნავად გამოიყურება. ბოლო ექვსი თუ 12 თვის განმავლობაში ჩვენთან ვარჯიშებზე უფრო ხშირად ვხედავთ და პროგრესი აშკარაა. შეუიარაღებელი თვალითაც ჩანს, რომ ნებისმიერ ორთაბრძოლაში შედის, რა მდგომარეობაშიც არ უნდა იყოს. ნამდვილი ათლეტია. სწრაფი, ძლიერი და ბურთის ფლობაში კარგია. მას ყველაფერი აქვს იმისათვის, რომ კარგი კარიერა შეიქმნას. უბრალოდ სწორ დროს თავის გამოჩენა სჭირდება, რასაც ახერხებდა. იმედი მაქვს, შანსებს კვლავ მიიღებს.

მას მოსმენა და სწავლა უყვარს. ახალგაზრდისთვის ამ უნარის ქონა ერთ-ერთი უმნიშვნელოვანესი მახასიათებელია. რა თქმა უნდა, აქ იმისთვის ვარ, რომ მას დავეხმარო და მაქსიმალური გავაკეთო. ვიცი, რომ ერთ დღეს ის დაიკავებს ჩემს ადგილს და ამის სულაც არ მეშინია, თავიდან არიდებას სულაც არ ვცდილობ, რადგან მომავლის დახმარება ძალიან მნიშვნელოვანია, სკოტი კი ნამდვილად არის მომავალი. მისი დახმარება ჩემი პასუხისმგებლობაა. დიდ სიამოვნებას მგვრის ახალგაზრდების გამოჩენა და მათთვის შანსის მიცემა. იქნება ეს ჩემი პოზიცია თუ სხვისი, თამაში სწორედ ასე უნდა ვითარდებოდეს და კლუბიც ამას უნდა ცდილობდეს".

წყარო: manutd.com